El úzdikteri Almatyǵa jınaldy. Onda sambo men qazaq kúresinen Álıa Moldaǵulovanyń 100 jyldyǵyna arnalǵan áskerıler arasyndaǵy ashyq birinshilik ótti.
Armıashylar sport kesheninde uıymdastyrylǵan jarysqa 400 den asa qatysýshy jınaldy, dep habarlaıdy aqshamnews.kz.
Samboshylar 7 salmaqta synǵa túsip, Aıbek Qalımov pen Jandos Beısenbaev, Arnur Qýataı men Sanjar Nurseıit, Azat Qýanov pen Bolat Sapar jáne Ádil Orazbaevtar óz salmaqtarynda oza shapty. Al, jarystyń ekinshi kúni qazaq kúresiniń myqtylary boz kilemge shyqty. Nátıjesinde Bekjan Tólepov 58 kelide top jarsa, Ernur Súleımen 60 kelide aldyna jan salmady. Sondaı-aq Áshim Saǵyndyq pen Jumajan Qojambekov, Ahmetqalı Ádilet pen Aıdar Beskempir jáne Qudiret Dosymovtar óz salmaqtarynda chempıon atandy. Alyptar básekesinde Ǵalymjan Qyryqbaı eshkimge des bermedi.
Erbol Qumarbekuly, QR Qorǵanys mınıstrliginiń apparat basshysy:
- Qazir Qorǵanys mınıstrligi sambo men qazaq kúresiniń damýyn basty nazarda ustap otyr. Aldaǵy josparymyzdy aıtar bolsaq, kúres zaldaryn zamanaýı úlgidegi quraldarmen jabdyqtap, áskerı mektepterde oqıtyn jastardyń sportpen shuǵyldanýyna tolyqtaı jaǵdaı jasaý. Bul keleshekte óz jemisin berip, sortshylarymyz álemdik bıikterdi baǵyndyrady degen úmit basym.
Arman Ábeýov, QR Qorǵanys mınıstrligi sport kommıtetiniń tóraǵasy:
- Osy jyly tamyz aıynda tuńǵysh ret Astana qalasynda qazaq kúresinen áskerıler arasyndaǵy álem chempıonaty ótedi. Búgingi jarys soǵan irikteý desek te bolady. Osy sambo men qazaq kúresinen uıymdastyrylǵan ashyq birinshilikke barlyq ishki áskerı qurylymdardyń sportshylary qatysty. Bul degenińiz, qazaq kúresi men sambonyń damýyna óz yqpalyn tıgizip, jastardyń sportqa degen qyzyǵýshylyǵy arta túsedi dep esepteımin.