Ábilhan Qasteev atyndaǵy QR Memlekettik óner mýzeıinde sýretshi Rafael Slekenovtiń «TANIR NURY» degen taqyryppen kórmesi ashyldy.
Oǵan óner ókiliniń 90-ǵa jýyq keskindemelik týyndysy qoıylǵan, dep habarlaıdy aqshamnews.kz
– Rafael Slekenovtiń kartınalary balalyq shaq týraly estelikter men adamzat pen názik tabıǵat, qorshaǵan álem arasyndaǵy únsiz baılanysty kórsete otyryp syr shertedi. Avtordyń týyndylaryndaǵy jan saraıynyń kórinisi bir ózgeshe sulý da syrly, tańǵajaıyp jumbaqqa toly «úı álemin» quraıtyndaı. Avtor úshin bul jumbaq meken úıi – qorǵany, qutqarýshy orny, ómiriniń jylýy men jaılylyǵynyń kórinisi sekildi. Avtor dál osy úıde, qarapaıym turmysta, adamdardyń rýhanı eńbegi men tabıǵattyń jasyl shuǵylasynda adam bolmysynyń poezıasyn kóredi, – deıdi kórme jetekshisi Laýra Ábildaeva.
Rafaeldiń týyndylarynda kókshil tús erekshe oryn alady. Ol dástúrli túsinik boıynsha – Táńirdiń kók aspanmen baılanysýy, túrki halyqtarynyń nanymynda mańyzdy jáne qurmetti bolyp sanalady. Sondyqtan da kórme «TANIR NURY» dep atalǵan.
Rafael Slekenov Qazaqstan Sýretshiler odaǵynyń múshesi, Kórkemsýret akademıasynyń korespondent-múshesi. «Tarlan» syılyǵynyń ıegeri. 2000 jyly «Jiger» halyqaralyq festıvaliniń İİİ oryn, 2001 jyly 4-shi Halyqaralyq «Shabyt» shyǵarmashyl jastar festıvaliniń İ oryn ıegeri. 2008 jyly Polsha Mádenıet mınıstrliginiń shákirtaqysyna ıe bolǵan. 2010 jyldan bastap Stokgolmdegi «Mirra Art Group» sýretshiler halyqaralyq qaýymdastyǵynyń múshesi.