Óńirlik komýnıkasıalar qyzmetiniń alańynda Almaty qalasy Ádilet departamentiniń zańdy tulǵalardy tirkeý bóliminiń basshysy Aqerke Qojahmetovanyń qatysýymen brıfıń ótti. Spıker saıası partıalardy tirkeý rásimin jeńildetý, zańnamaǵa usynylǵan túzetýler týraly aıtyp berdi, dep habarlaıdy Almaty-akshamy.kz.
Onyń aıtýynsha, saıası partıany qurý tártibi «Saıası partıalar týraly» zańmen retteledi.
Ol 2022 jylǵy 16 naýryzdaǵy Prezıdenttik saıası reformalar baǵdarlamasyna sáıkes, partıalardy tirkeý rásimin ońaılatý kózdelgenin eske saldy. Bastamalardy zańnamalyq bekitýdiń boljamdy merzimi – 2022 jylǵy jeltoqsan.
«Saıası partıa sany bir myń adamnan kem emes (boljamdy ońaılatý – sany jeti júz adamnan kem emes), saıası partıanyń Quryltaı sezin (konferensıasyn) shaqyratyn jáne oblystardyń, respýblıkalyq mańyzy bar qalanyń jáne astananyń úshten ekisiniń atynan ókildik etetin Qazaqstan Respýblıkasy azamattary tobynyń bastamasy boıynsha qurylady», - dep habarlady Aqerke Qojahmetova.
Almaty qalasy Ádilet departamentiniń spıkeri keltirgen «Saıası partıalar týraly» zańnyń 6-babynyń keıbir úzindilerin keltiremiz:
Azamattar saıası partıanyń Quryltaı sezine (konferensıasyna) jeke ózi qatysady.
Saıası partıanyń quryltaı sezin (konferensıasyn) daıyndaý jáne ótkizý úshin Qazaqstan Respýblıkasy azamattarynyń bastamashyl toby músheleriniń qatarynan quramynda keminde on adam bolatyn Uıymdastyrý komıteti qurylady.
Uıymdastyrý komıteti Ádilet Mınıstirligine Zańnyń 10-babynda kózdelgen qujattardy qosa bere otyryp, saıası partıa qurý nıeti týraly habarlama usynýǵa tıis.
Ádilet mınistirligi habarlamany alǵan kúni uıymdastyrý komıtetiniń ýákiletti adamyna olardyń usynylǵanyn rastaıtyn qujatty beredi.
Uıymdastyrý komıteti tirkeýshi organ rastama bergennen keıin óz qyzmetine kirisedi.
Budan ári rastaý berilgen kúnnen bastap eki aı ishinde (boljamdy ońaılatý – merzimin uzartyp úsh aı ishinde), uıymdastyrý komıteti saıası partıanyń Quryltaı sezin (konferensıasyn) ótkizýge tıis.
«Saıası partıany memlekettik tirkeý úshin onyń quramynda barlyq oblystarda, respýblıkalyq mańyzy bar qalalarda jáne astanadaǵy qurylymdyq bólimsheleriniń (fılıaldary men ókildikteriniń) árqaısysynyń quramynda keminde alty júz partıa múshesi (boljamdy ońaılatý – eki júz partıa múshesine azaıtý) bar keminde jıyrma myń partıa múshesi bolýy negizgi sharttardyń biri bolyp tabylady (boljamdy ońaılatý – bes myń partıa múshesine azaıtý)», - dedi Aqerke Qojahmetova.
ÓKQ brıfıńinde saıası partıany memlekettik tirkeý úshin qandaı qujattar qajet ekenin habarlady. Olar Ádilet mınıstrligine saıası partıanyń quryltaı sezi (konferensıasy) ótkizilgen kúnnen bastap tórt aıdan keshiktirilmeı usynylady.
Aqerke Qojahmetovanyń aıtýynsha, tirkeýshi organǵa kelesi qujattar usynylady:
- ótinish;
- saıası partıanyń basshysy qol qoıǵan saıası partıanyń jarǵysy men baǵdarlamasy eki danada;
- saıası partıa quryltaı seziniń (konferensıasynyń) HATTAMASY;
- saıası partıa músheleriniń elektrondyq jáne qaǵaz jetkizgishterdegi tizimderi;
- zańdy tulǵany memlekettik tirkegeni úshin alym tólengeni týraly qujat (14 AEK).
Saıası partıalardy memlekettik tirkeý merzimi tirkeýge ótinish berilgen kúnnen bastap 1 aıdy quraıdy.
Saıası partıany memlekettik tirkeýge qujattar kelip túsken kezde ýákiletti memlekettik organdardan qorytyndy alǵanǵa deıin azamattardyń bastamashyl toby men saıası partıa músheleri tizimderiniń anyqtyǵyna tekserý júrgizý úshin tirkeý merzimi úziledi.
İs júzinde ýákiletti memlekettik organdarda partıa tizimin tekserý 2 aıǵa jýyq ýaqytty alady.
Joǵaryda atalǵan adamdardy partıa músheleriniń tiziminde belgileý, sondaı-aq músheniń ony saıası partıaǵa qabyldaǵany týraly jazbasha erik bildirýiniń bolmaýy tirkeýden bas tartýǵa negiz bolyp tabylady. Saıası partıa memlekettik tirkelgen kúnnen bastap alty aı ishinde (boljamdy ońaılatý – bir jylǵa merzimin uzartý), óziniń qurylymdyq bólimshelerin (fılıaldary men ókildikterin) aýmaqtyq ádilet organdarynda eseptik tirkeýdi júrgizýge mindetti.
Partıany tirkeý talaptaryn jeńildetý olardy qurý boıynsha bastamalardyń artýyna ákeledi, al joǵaryda atalǵan jaǵdaılardy eskere otyryp, olardy qurý prosesin edáýir jeńildetedi.