Týrnırde 177 boksshy baq synasty
Qazaqstan Respýblıkasynyń tuńǵysh qorǵanys mınıstri Keńes Odaǵynyń Batyry, №1 Halyq Qaharmany Saǵadat Nurmaǵambetovti eske alýǵa arnalǵan bokstan ótken halyqaralyq týrnırge Qazaqstan, Ózbekstan, Tájikstan, Qyrǵyzstan jáne Qytaı Halyq Respýblıkasynyń atynan quramynda 177 bylǵary qolǵap sheberi bar 25 komanda qatysty, dep habarlaıdy Almaty-akshamy.kz.
– Qarýly Kúshterde qazaq halqynyń dańqty uly, armıa generaly Saǵadat Nurmaǵambetovti eske alýǵa arnalǵan kóptegen is-sharalar uıymdastyryldy. Eske alý sharalary batyrdyń týǵan jeri Aqkól qalasynda, Qurlyq áskerleriniń áskerı ınstıtýtynda, astanalyq áskerı kolejde jáne basqa garnızondarda ótti. Al búgingi týrnırdiń halyqaralyq mártebesin erekshe atap ótýge bolady, – dedi Qorǵanys mınıstrligi Tárbıe jáne ıdeologıalyq jumystar departamentiniń bastyǵy, ádilet polkovnıgi Tileýhan Basqojaev.
Qorǵanys mınıstrliginiń Sport komıtetiniń tóraǵasy – Ortalyq sport klýbynyń bastyǵy, podpolkovnık Arman Ábeýov atap ótkendeı, qazaq halqynyń dańqty uly Saǵadat Nurmaǵambetovti eske alý týrnırinde elimizdiń eń myqty boksshylary irikteýden ótip, úzdikterdiń úzdigin jeńýde.
– Osyndaı jarystardyń arqasynda halyqaralyq tájirıbe jınaqtap, jańa esimder anyqtalady, – dep tolyqtyrdy podpolkovnık Arman Ábeýov.
Týrnır qorytyndysy boıynsha, 48 keli salmaqta Jenish Ulpatov (Qyrǵyzstan), 51 kelide Danıal Sábıtov (Batys Qazaqstan oblysy), 54 kelide Damır Ábdiqadyr (Qorǵanys mınıstrliginiń Ortalyq sport klýby), 57 kelide Orazbek Asylqulov (Aqmola oblysy), 60 kelide Beıbarys Jeksen (Jambyl oblysy), 63,5 kelide Sultan Mýsınov (Aqmola oblysy) jeńimpaz bolsa, 67 kelige deıingi salmaqta Dilmurat Mıjıtov (Qorǵanys mınıstrliginiń Ortalyq sport klýby), 71 kg – Darhan Dúısebaı (Qorǵanys mınıstrliginiń Ortalyq sport klýby), 75 kg – Aıatýlla Tákijanov (Pavlodar oblysy), 80 kg – Erasyl Jaqpekov (Abaı oblysy), 86 kg – Shaımurat Qusaıynov (Pavlodar oblysy), 92 kg – Asan Rezbek (QHR), 92 keliden astam salmaqta Abdýrashıt Ramela (QHR) utyp, saıys chempıondary atandy.