Almatydaǵy ózekti máselelerdiń biri qaldyqtardy basqarý, onyń ishinde ekologıalyq mádenıetti qalyptastyrý taqyryby bolyp tabylady.
Basty maqsat - qaldyqtarmen kúresý ǵana emes, olardy joıý úshin alǵy sharttar jasaý ári jas kezden bastap ekologıalyq mádenıetti qalyptastyrý, dep habarlaıdy Almaty-akshamy.kz.
2022 jyly Almaty ákimdigi EN Social kompanıasymen birlesip, «Jasyl mektep» pılottyq jobasyn iske qosty. Joba mektepter ishinde eko-reındjerler tobyn qurýǵa baǵyttalǵan, olar sarapshylardyń tehnıkalyq jáne ádisnamalyq qoldaýymen mektepterde qaldyqtardy bólek jınaýdy júzege asyrdy, bastaýysh synyptar úshin trenıńter ótkizdi, mektepterde zattar men kitaptar almasý boıynsha ekofestıvaldar uıymdastyrdy, qustarǵa jem salǵyshtar jasady jáne ózderiniń ekobelsendilikterin ilgeriletý úshin mekteptiń telegram men ıýtýb arnalaryn qurdy. Jobaǵa barlyǵy 11 mektep qatysty: №25 gımnazıa, №46 gımnazıa, HighTech mektebi, № 125 mektep, RFMM, №172 gımnazıa, №185 mektep, №200 gımnazıa, “Prestıj” mektebi, №76 mektep, №143 mektep-lıseı.
Aksıa qorytyndysy boıynsha, qalalyq mektepter qaıta óńdeýge 1,5 tonna qaldyq tapsyrdy. Maýsym aıynyń basynda oqý jyly aıaqtalǵannan keıin barlyq paıdalanylǵan mektep jáne jumys dápterlerin, kontýrlyq kartalardy, kúndelikterdi jáne t.b. jınap, olardy qaıta óńdeýge berý josparlanýda.
Bul joba mektepter ózderiniń mıkroýchaskelerinde ekohabqa aınalýy, bilimderin otbasylaryna jetkizýi, sondaı-aq bolashaqta qaıta óńdeýge jiberiletin qaldyqtardy qabyldaýy múmkin ekenin taǵy da kórsetti. Almaty mektepteri osy jobamen 100% qamtylǵan jaǵdaıda, qalada qaldyqtardy qaıta óńdeýge tapsyrý máselesi sheshiledi, al balalar arqyly turǵyndar arasynda ekomádenıettiń negizgi qaǵıdattaryn engizýge bolady.
Joba qorytyndysy boıynsha qatysýshylardy marapattaý rásimi josparlanǵan. Ótetin orny: Almaty q., Dostyq dańǵyly, 104, Green point (Arman kınoteatry). Ótkizý kúni – 2023 jylǵy 29 mamyr, 12:00-14:00.
Marapattaý rásimin ótkizgennen keıin balalar Almaty qoqys suryptaý zaýytyna ekskýrsıaǵa baryp, qaladaǵy qaldyqtardy basqarýdyń barlyq prosesin kóre alady.