Búginnen bastap merdiger uıym Rysqulov dańǵylyn ortasha jóndeý jumystaryn bastaıdy.
Jóndeý jumystary Nemırovıch-Danchenko kóshesinen Jangeldın kóshesine deıingi aralyqta júrgiziletin bolady, dep habarlaıdy Almaty-akshamy.kz qalalyq mobıldilik basqarmasyna silteme jasap.
Jalpy uzyndyǵy 4,7 shaqyrymdy quraıtyn Rysqulov dańǵylynda sońǵy jóndeý jumystary 2013 jyly júrgizilgen. Atalǵan dańǵyl boıynsha kólik aǵyny óte joǵary.
«Tekserý kezinde jol boıynda kóptegen shuńqyr, oıylǵan jerler, qabyrshaqtaný jáne ınjenerlik jelilerdi salǵannan keıingi jol tóseminiń otyrýy anyqtalǵan. Osynyń barlyǵyn eskere otyryp, Rysqulov dańǵylyn 2022 jylǵy jol jóndeý jumystary josparyna qosý týraly sheshim qabyldandy», - dep habarlady qalalyq mobıldilik basqarmasy kóshe-jol jelilerin damytý bóliminiń basshysy Nurzat Ordabaev.
Eske sala ketsek, bıyl Almatyda 224 kóshede jol jabynyna ortasha jóndeý júrgizý josparlanýda. Jóndeletin joldardyń jalpy uzyndyǵy 200 km quraıdy. Aǵymdaǵy jyly "Qaırat", "Álmerek", "Alǵabas", "Aqjar" jáne "Shańyraq-1" shaǵynaýdandarynda 70 km jańa jol salý josparlanýda. Bul jaqsy jáne qanaǵattanarlyq jaǵdaıdaǵy qala joldarynyń úlesin 86%-ǵa deıin jetkizýge múmkindik beredi.
Vision Zero tujyrymdamasyna sáıkes, ortasha jóndeýdi júrgizý aıasynda kólik pen jaıaý júrginshiler qozǵalysynyń qaýipsizdigin qamtamasyz etý úshin kóshelerde trapesıa tárizdi jasandy kedergilerdi, qaýipsizdik qaqpaqtaryn, qaýipsizdik araldaryn ornatý boıynsha jumystar júrgiziletin bolady.
