Halyqty tegin emdeýge múmkindik týady.
Almatyda respýblıkalyq revmatologıalyq ortalyq ashylady. Bul týraly Qazaq revmatologıa alqasynyń prezıdenti Ǵalymjan Toǵyzbaev búgin ótken VI Eýrazıalyq revmatologtar kongresinde málimdedi, dep habarlaıdy Almaty-akshamy.kz Almaty.tv silteme jasap.
Igi bastama Densaýlyq saqtaý mınıstrligi tarapynan qoldaý taýyp, qazir ony júzege asyrý máseleleri talqylanyp jatyr. Jobanyń negizgi maqsaty – Qazaqstanda bul salany damytý. Táýelsiz Memleketter Dostastyǵy elderiniń mamandary qatysqan jıynda bilim men ǵylym jaǵynan tájirıbe almasý kózdelip otyr.
«Osy jıynnan keıin jańa ortalyq ashylady. Jańa tehnologıalardy elge kirgizemiz. Endi memleket tarapynan qoldaýǵa ıe bolyp, halyqty tegin emdeýge múmkindik týady. Jańa tehnologıalar revmatoıdty artrıt aýrýlaryn emdeıdi», – dedi QR Densaýlyq saqtaý mınıstrliginiń shtattan tys bas revmatology Ǵalymjan Toǵyzbaev.
Alqaly jıynǵa Eýropa men Azıa elderiniń jetekshi profesorlary da onlaın qatysyp, tájirıbelerin bólisti. Otandyq revmatologtar kadr daıarlaý máselesine erekshe toqtaldy. Óıtkeni, qazir elimizde ımýndyq-qabyný revmatıkalyq aýrýlary bar 861 myń 178 pasıent tirkelgen eken. Al olardy emdeıtin dárigerler az. Uıymdastyrýshylardyń sózinshe, respýblıkalyq revmatologıalyq ortalyqtyń iske qosylýy – maman tapshylyǵyn joıýǵa múmkindik beredi.
«Birinshi – bizde mamandar jetispeıdi. Ekinshi – bul óte kúrdeli aýrý. Ol úshin úlken zerdeli zerthanalar kerek. Óıtkeni, ol bir nársemen bite qoımaıdy», – dedi medısına ǵylymdarynyń doktory, profesor Ýálıhan Júsip.