Almaty qalasyndaǵy M. Bazarbaev atyndaǵy №138 gımnazıada pedagogıkalyq eńbek ardagerlerin ulyqtaýǵa arnalǵan respýblıkalyq «EDUTALK» keshi ótti.
İs-sharada ustaz mamandyǵynyń mańyzdylyǵy, onyń qıyn da qadirli joly men qoǵamǵa qosqan eleýli úlesi sóz boldy, dep habarlaıdy aqshamnews.kz.
Bul kúni gımnazıada «Qazaqstannyń Eńbek Eri», «Qazaqstan Respýblıkasynyń eńbek sińirgen ustazy» ataǵyna ıe bolǵan tanymal pedagogter: Gúljanar Nurpeıisova, Orynsha Qarabalına, Maıra Mámbetova, Lázzat Esmaǵanbetova, Gúlbaný Mahambetova, fılologıa ǵylymdarynyń doktory Asyly Osman, qoǵam qaıratkeri, tarıh ǵylymdarynyń profesory Qaıyrken Kúnafına, QR mádenıet qaıratkeri Gúlshara Esetova jáne elimizdiń ár óńirinen kelgen mektep basshylary men muǵalimderi bas qosty.
Keshtiń shymyldyǵy «Kóktegi alaý» atty teatrlandyrylǵan qoıylymmen ashyldy. Onda gımnazıanyń joǵary synyp oqýshylary Uly Otan soǵysy jyldaryndaǵy jalǵyz qazaq ushqysh qyzy – Hıýaz Dospanova men sol kezeńdegi erlikpen qaza tapqan barlyq batyrlardyń rýhyna arnaý retinde óner kórsetti.
Kesh barysynda ustazdar júrek tebirenterlik estelikterimen bólisip, ustazdyqtyń – tek bilim berý emes, adam taǵdyryn ózgerte alatyn mısıa ekenin dáleldedi.
№138 gımnazıa dırektory Medet Qasymbaev óziniń bilim ordasyn basqarý jolyndaǵy ómirlik tájirıbesimen bólisip, kórermenderdiń ystyq yqylasyna bólendi.
Sahnaǵa shyqqan ardager ustazdardyń árbir sózin kórermender zor qoshemetpen qarsy aldy. Keshtiń pikirtalas bóligi de kórermender qyzyǵýshylyǵyn týdyrdy. «Ustaz — mısıa ma, mamandyq pa?» degen taqyryp qyzý talqylanyp, qatysýshylar mazmundy suraqtar qoıyp, tushymdy jaýaptar aldy. Sondaı-aq «Bir qatelik – úlken ókinish», «Bir kúlki – myńdaǵan motıvasıa» sekildi ómirlik oı týdyrar taqyryptar keńinen talqylandy.
— Búgingi «EDUTALK» keshi — ashyq ári shynaıy dıalog alańyna aınaldy. Ómir joldary men kásibı tájirıbeleri jas urpaqqa úlgi bolarlyq ustazdar jaıly aıtylǵan árbir áńgime jas býynnyń ustaz mamandyǵyna degen qurmetin arttyra tústi, — dedi Bostandyq aýdany bilim bóliminiń basshysy Aıgúl Qasymbek.
İs-shara Qazaqstan Respýblıkasy Oqý-aǵartý mınıstrligi janyndaǵy Ardagerler respýblıkalyq keńesiniń 2025 jylǵy 26 naýryzdaǵy №11 hattamalyq tapsyrmasyn oryndaý aıasynda jáne jalpyadamzattyq pen ulttyq qundylyqtarǵa negizdelgen Biryńǵaı tárbıe baǵdarlamasyn júzege asyrý maqsatynda uıymdastyryldy.