Respýblıka saraıynda elimizdiń basty ulttyq merekesi – Respýblıka kúnine arnalǵan merekelik konsert ótti. İs-sharaǵa Almaty ákimi Erbolat Dosaev, Qoǵamdyq keńes músheleri, máslıhat depýtattary, zıaly qaýym ókilderi, densaýlyq saqtaý, bilim berý, mádenıet salasynyń qyzmetkerleri jáne búgin memlekettik nagradalarmen marapattalǵan azamattar qatysty, dep habarlaıdy aqshamnews.kz
Konserttiń resmı bólimi Qazaqstan Respýblıkasynyń Memlekettik týyn sahnaǵa alyp shyǵyp, eldiń eńbek sińirgen qaıratkeri Talǵat Kúzembaevtyń Memlekettik ánurandy oryndaýymen bastaldy.
Baǵdarlamada SteppeSons toby, Karına Abdýllına, ARO jáne Jubanysh Jeksenuly, Janar Doǵalova, ALPHA toby jáne basqa da tanymal artıser patrıottyq ánder oryndady. Belgili dombyrashy-kúıshi Asylbek Eńsepovtyń «Mahabbat ózeni» shyǵarmasy bul joly eki skrıpka dýetiniń súıemeldeýimen oryndaldy.
Sonymen qatar, Baıǵalı Serkebaev jas oryndaýshy Kyle Ruh-pen birge jaryq shoý aıasynda A’Studio tobynyń ánderinen popýrrı aıtty. Jastardyń kýmıri Sadraddın «Melodrama» ánin shyrqasa, aty ańyzǵa aınalǵan «Dos-Muqasan» toby «Almaty túni» jáne «Qaıdasyń?» atty tanymal hıtterin oryndady. Sondaı-aq, sahnada «Wake up» baletiniń shyǵarmashylyq jáne bı qoıylymdary kórsetilip, Otanǵa degen mahabbatty beıneledi.
Konsert Qazaqstannyń halyq artısi Roza Rymbaeva men eldiń eńbek sińirgen qaıratkeri Birjan Hasanǵalıevtiń hordyń súıemeldeýimen oryndaǵan «Atameken» ánimen aıaqtalyp, konserttiń barlyq qatysýshysy sahnaǵa shyqty.