«Medeý» muz aıdynynda Memlekettik týdy kóterý boıynsha saltanatty rásim ótti. İs-sharaǵa Almaty qalasynyń ákimi Erbolat Dosaev, qoǵam qaıratkerleri, máslıhat depýtattary, úkimettik emes jáne jastar uıymdarynyń ókilderi, sondaı-aq qala turǵyndary qatysty.
Týdy kóterý rásimi dástúr boıynsha áskerı orkestrdiń súıemeldeýimen memlekettik ánurandy oryndaýmen jalǵasty. Memlekettik týdyń aýdany 98 sharshy metr bolsa, bıiktigi 40 metr.
Eske sala keteıik, Respýblıka kúni qarsańynda qala ákimi Erbolat Dosaev Qazaqstan Prezıdenti Qasym-Jomart Toqaevtyń atynan memlekettik marapattardy tabystady. Marapattalǵandardyń arasynda eldiń áleýmettik-ekonomıkalyq jáne mádenı damýyna eleýli úles qosqan almatylyqtar bar. Sondaı-aq Respýblıka saraıynda merekelik konsert ótti.
Búgin Almatyda merekege oraı drondar shoýy ótedi: saǵat 21:00-de Abaı alańynda, al 21:30-da «Astana» alańynda 500-den astam dron sınhrondy túrde kókke kóterilip, ulttyq mádenıet elementteri men el tarıhyndaǵy mańyzdy sátterdi beıneleıtin 3D beıneler jasaıdy. Jaryq ı qondyrǵylary mýzykalyq shyǵarmalarmen súıemeldenedi, bul ulttyq birlik pen maqtanysh rýhyn aıshyqtaıdy.
Buǵan qosa, saǵat 20:00-de Respýblıka kúnine oraı «Kóktóbe» telemunarasynda merekelik sáýlettik jaryqtandyrý qosylady. Aıta ketsek, telemunaranyń jaryqtandyrý júıesi 30 tamyzda iske qosylyp, Almatynyń mańyzdy nysandarynyń biri retinde jańartylǵan.