Almatyda Respýblıka kúni qarsańynda Qurylys basqarmasy tarapynan balabaqshalar men mektepterdiń jańa ǵımarattaryn salý, kúrdeli jóndeý jáne qaıta jańartý jumystary aıaqtaldy, - dep habarlaıdy Aqshamnews.kz.
Bostandyq aýdanynda estý qabileti buzylǵan balalarǵa arnalǵan №137 túzetý balabaqshasy men №87 balabaqshada seısmıkalyq nyǵaıtý jáne kúrdeli jóndeý júrgizildi. Sondaı-aq, 240 oryndyq jańa balabaqsha ǵımaraty qaıta jańǵyrtyldy. Jańartylǵan nysandar zamanaýı toptyq bólmelermen, mýzykalyq jáne dene shynyqtyrý zaldarymen, medısınalyq jáne turmystyq bloktarmen jabdyqtalǵan. Barlyq ǵımarat balalarǵa jaıly ári qaýipsiz bolýyna tolyqtaı beıimdelgen.
Osy aýdanda №73 mektep-gımnazıasy jańartyldy. Joba aıasynda ǵımarattyń qurylymdary nyǵaıtylyp, qasbeti jylytyldy, ınjenerlik júıeler, shatyr jáne ishki árleý tolyq jańartyldy. Mektepte zamanaýı oqý kabınetteri, kitaphana, medıateka jáne akt zaly jasaqtaldy.
Medeý aýdanynda balabaqsha ǵımaratyna seısmıkalyq kúsheıtýmen birge kúrdeli jóndeý júrgizildi. İshki keńistik jańartylyp, tárbıelenýshiler men pedagogtar úshin jaıly jaǵdaı jasaldy. Balalarǵa arnalǵan oıyn jáne uıqy bólmeleri, as blogy men medısınalyq bólim jabdyqtaldy.
Naýryzbaı aýdanynda №174 mektep-gımnazıasyna jańa qosymsha ǵımarat salyndy. Zamanaýı nysan mýltımedıalyq kabınettermen, sport zalymen, býfetpen jáne demalys aımaqtarymen qamtylǵan. Sabaq ótetin bólmeler jańa tehnıkalyq quraldarmen jáne ınteraktıvti paneldermen jabdyqtalyp, bilim berý sapasyn arttyrýǵa múmkindik beredi.
Barlyq nysan qaýipsizdik, energıa únemdilik jáne jaılylyqtyń zamanaýı talaptaryna tolyq sáıkes keledi. Bul jobalardyń júzege asyrylýy Almaty qalasynyń áleýmettik ınfraqurylymyn damytýdaǵy mańyzdy qadam bolyp tabylady.