Búgin Qazaqstanda AES qurylysy máselesi boıynsha respýblıkalyq referendým júrip jatyr. Almatyda barlyq 624 saılaý ýchaskesi ashyldy. M. Tynyshpaev atyndaǵy Qazaq kólik jáne komýnıkasıalar kolejinde ornalasqan №84 saılaý ýchaskesi tańǵy 07:00-de esigin aıqara ashty.
Ýchaskede saılaý búletenderin berý orny, qupıa daýys berýge arnalǵan kabınalar jáne stasıonarlyq móldir jáshik ornatylǵan.
Saılaý ýchaskesi ashylǵanǵa deıin-aq azamattyq paryzyn óteýge kelgenderdiń qarasy kóp boldy. Qalyptasqan dástúr boıynsha ýchaskede alǵashqy saılaýshylarǵa sımvolıkalyq syılyqtar berildi.
«Búgin alǵashqy bolyp daýys bergenderge tátti syılyqtar berildi. Sondaı-aq, alǵash ret referendýmǵa kelgenderdi de marapattadyq. Jalpy, atmosfera saltanatty, saılaý úderisiniń yńǵaılylyǵy úshin barlyq jaǵdaı jasalǵan», – dedi №84 ýchaskelik saılaý komısıasynyń tóraǵasy Ǵalymjan Áshirbaev.
Onyń aıtýynsha, bul ýchaskede 1469 adam tirkelgen, onyń ishinde 217 adam alǵash ret daýys berse, almatylyq Qazybek Álihanov úshin referendým kúni týǵan kúnimen sáıkes keldi. Sondaı-aq ýchaskede 279 zeınetker jáne erekshe qajettiligi bar 9 adam tirkelgen, olarǵa arnaıy kabınalar qarastyrylǵan. Estý qabileti nashar turǵyndar qulaqqappen jabdyqtalǵan kompúterdi paıdalana alady. Kórý qabileti nashar adamdar úshin Braıl qarpimen jazylǵan arnaıy búletender, qosymsha jaryq jáne lýpalar bar. Sonymen qatar, onlaın rejımde sýrdoaýdarmashylar kezekpen jumys isteıdi.
«Meniń oıymsha, referendýmǵa qatysý – árbir azamattyń boryshy. AES salý máselesi óte mańyzdy. Internetten jańalyqtar men pikirlerdi oqý bir bólek, al tańdaý jasap, óz daýysyńdy berý múlde basqa», – dep almatylyq Maksım Gorbachev oıyn aıtty.
Eń belsendi qala turǵyndary tańdaýyn jasap úlgerdi.
«Memlekettiń damýyna úles qosýǵa bizde biregeı múmkindik bar. Ony paıdalanýymyz kerek!», – dedi saılaýshy Danıar Ysqaqov.
Aıta ketý kerek, eger saılaýshylar belgili sebeppen ýchaskege kele almasa, komısıa músheleri jyljymaly jáshikpen úılerine barady.
Eske sala keteıik, búgin Qazaqstan aýmaǵynda atom elektr stansıasyn salý máselesi boıynsha respýblıkalyq referendým ótip jatyr. Almaty ákimi Erbolat Dosaev jubaıymen birge tańerteń №388 mektep-lıseıinde ornalasqan saılaý ýchaskesine kelip, daýys berdi. Qaladaǵy saılaý ýchaskeleri saǵat 20:00-ge deıin jumys isteıdi.