Búgin saılaý ýchaskesine saǵat 7:15-te kelip, eń birinshi daýys bergen «Kóktem-1» yqshamaýdanynyń turǵyny Gúljan Ýtegenova boldy.
aqshamnews.kz tilshisimen tildesken Gúljan Ýtegenova bul is-sharanyń mańyzdylyǵyn tereń túsinemin deıdi.
«Qazaqstandyqtar bul referendýmnan úlken úmit kútip otyr. El úshin, bolashaq úshin jaqsy ózgerister bolady dep senemin. Meniń de daýysymnyń mańyzdy ekenin sezingen soń, erterek kelip daýys berip jatyrmyn»,-deıdi Gúljan Ýtegenova.
Ýchaskelik saılaý komısıasynyń tóraǵasy Medet Qasymbaevtyń aıtýynsha, ýchaskede 2332 saılaýshy bar. Olardyń eń jasy ádettegishe 18-de, eń qart saılaýshynyń jasy – 84-te.
Aıta keteıik, Almatyda saılaý ýchaskelerinde daýys berý jergilikti ýaqyt boıynsha saǵat 07:00-den 20:00-ge deıin júrgiziledi.