Almatyda KVI taralýynyń aldyn alý jónindegi jedel shtabtyń kezekti otyrysynda qala ákimi Baqytjan Saǵyntaevtyń tóraǵalyǵymen sanıtarlyq-epıdemıologıalyq jaǵdaıdy turaqtandyrý jáne qala turǵyndaryn vaksınalaý qarqyny jónindegi sharalar qaraldy.
Infeksıanyń taralý qarqyny boıynsha qalanyń «qyzyl» aımaqtan «saryǵa» ótýine qaramastan, shekteýler taǵy bir apta boıy saqtalady. Megapolıste áýejaılarda, TJ jáne avtovokzaldarda, sondaı-aq oqý oryndarynda profılaktıkalyq sharalardy kúsheıtý jalǵasýda, dep habarlaıdy Almaty-akshamy.kz
Kórshiles Reseıdegi epıdemıologıalyq ahýaldyń nasharlaýyna baılanysty almatylyqtar sanıtarlyq-epıdemıologıalyq sharalardy saqtaýdy jalǵastyryp, indetke tosqaýyl qoıý úshin vaksınalaný qarqynyn kúsheıtýleri tıis.
Reseı men Eýropa elderinen kelgender derttiń kezekti ósýine jol bermeý úshin baqylaýǵa alynady. Búgin mobıldi brıgadalar áýejaıda, temirjol vokzaldarynda jáne avtovokzaldarda kezekshilik etedi. Áýejaıda halyqaralyq ushyp kelý zaldarynda temperatýrasy bar jolaýshylardy anyqtaý úshin 7 stasıonarlyq baılanyssyz teplovızor ornatylǵan, kelgenderge saýalnama júrgiziledi. Taǵy bir teplovızor ishki reıster zalynda ornalasqan. Budan ózge, áýejaı Ashyq jobasyna qatysýshy, onda osy jyldyń 21 mamyrynan bastap «qyzyl» mártebesi bar 257 jáne «sary» mártebesi bar 54 adam anyqtaldy.
B. Saǵyntaev juqtyrý dınamıkasynyń tómendeýine qaramastan, sanıtarlyq dárigerler men epıdemıologtardyń shekteý sharalaryn saqtaý jónindegi usynystaryna jiti nazar aýdarý kerektigin atap ótti. Almatyda KVI boıynsha jaǵdaı optımısik boljam boıynsha damýda, kún saıyn 231-den 300-ge deıin juqtyrý oqıǵasy tirkeledi. Degenmen, derttiń asqynýy jáne taǵy ósýi múmkin, óıtkeni vırýs únemi ózgerýde.
SEBD málimetteri boıynsha, qala turǵyndary kóbinese saýda obektilerinde koronavırýs juqtyrady – 34%, qoǵamdyq kólikte – 24%, otbasylarmen baılanysta – 18% jáne bazarlarda – 9%.
Shekteý sharalary eldiń bas memlekettik sanıtarlyq dárigeriniń qaýlysyna sáıkes 7 kún boıy jalǵasady. Báseńdeý nemese kúsheıtý máseleleri qaladaǵy epıdemıologıalyq ahýaldyń damýyna baılanysty qaralatyn bolady.
Ázirge monıtorıńtik toptar buzýshylyqtardy anyqtaý jumystaryn jalǵastyrady. Mysaly, ótken aptadaǵy 18-25 qazan aralyǵynda Almatyda kúndizgi jáne túngi tekserýler barysynda karantındik shekteýlerdi buzǵan 12 kásipkerlik nysany anyqtaldy. 6 zańdy jáne 77 jeke tulǵa ákimshilik jaýapkershilikke tartyldy, 47 qoǵamdyq kólikti tekserý barysynda maska rejımin buzǵany úshin 6 adam jaýapkershilikke tartyldy.
Mektepke deıingi mekemelerdi tekserý jalǵasýda, mobıldi toptar 189 memlekettik balabaqsha men 38 mektepke deıingi uıymdy aralady. Máselen, №154 balabaqshada qyzmetkerler arasynda maska rejımin buzý anyqtaldy, qashyqtyq saqtalmaǵan. №№ 25, 48 balabaqshalarda makırovkalar jasalmaǵan. № 59 jáne 148 balabaqshalarda bólmelerdi ylǵaldy jınaý jáne dezınfeksıalaý jónindegi talaptar buzylǵan.
Tekserý kezinde 7 JOO-da sanıtarlyq normalardyń buzylǵany anyqtaldy, sanıtaızerler jetispedi, resırkýlátorlar bolmaǵan. Keıbir jataqhanalarda oqshaýlanǵan stýdentter bólmeleri joq. Jekelegen JOO-larda oqýshylardyń Ashyq jobasy boıynsha ishke kirýi baqylaýǵa alynbaǵan.
Buzýshylar tiziminde – Logıstıka jáne kólik akademıasy, Qazaq ınjenerlik-tehnologıalyq ýnıversıteti, Sankt-Peterbýrg Gýmanıtarlyq kásipodaqtar ýnıversıteti, Qazaqstan-Brıtan tehnıkalyq ýnıversıteti, Qazaq sport jáne týrızm akademıasy, UIB Halyqaralyq bıznes ýnıversıteti jáne Kaspıı ýnıversıteti bar.
Onyń ústine, Almatydaǵy stýdentterdiń jalpy sanynyń 57%-y vaksınalanǵan. JOO oqytýshylarynyń arasynda vaksınalanǵandar – 90%. Epıdemıologtar jastar men orta jastaǵy adamdar ınfeksıanyń negizgi tasymaldaýshylar dep sendiredi. Olardyń aıtýynsha, 20-39 jas aralyǵyndaǵy qalalyqtardyń 31%-dan astamy dertti jıi juqtyrady, al sońǵy eki aptada osy jas tobyndaǵylardyń derti shamamen 4%-ǵa ósken.
Almatyda koronavırýs juqtyrǵandar sany burynǵysynsha joǵary, barlyǵy 176 727 adam aýyryp qaldy. Stasıonarda 1205 adam emdelýde. Aıta keterligi, koronavırýsqa qarsy birinshi komponentpen 987 305 almatylyq egildi.
Jedel shtab almatylyqtardy KVI-ǵa qarsy vaksınadan belsendi ótýge taǵy da shaqyrdy, óıtkeni ujymdyq ımýnıtettiń qalyptasýy shekteýlerdi kezeń-kezeńimen alyp tastaýǵa jáne qalypty ómir saltyna oralýǵa múmkindik beredi.