Baqyt Áshimovanyń týǵanyna 85 jyl
Abaı atyndaǵy Qazaq ulttyq akademıalyq opera jáne balet teatrynda Qazaqstannyń halyq ártisi Baqyt Áshimovanyń týǵanyna 85 jyl tolýyna oraı Evgenıı Brýsılovskııdiń «Qyz Jibek» operasy qoıyldy, dep habarlaıdy Almaty-akshamy.kz.
«Qyz Jibek» operasyndaǵy basty rólderdi Áıgerim Sháripbek (Jibek), Bolat Qanaǵatov (Tólegen), Esengeldi Rza (Bekejan) oınasa, spektákldegi Qamqa partıasyn Baqyt Áshimovanyń shákirti QR eńbek sińirgen qaıratkeri Dına Hamzına somdady.
Baqyt Áshimovanyń shyǵarmashylyq ómiri 30 jyldan astam Abaı atyndaǵy Qazaq memlekettik akademıalyq opera jáne balet teatrymen tyǵyz baılanysta boldy.
Baqyt Áshimova qazaq jáne shetel klasıkasynyń opera spektáklderinde kóptegen partıalardy oryndady.
Onyń E.Brýsılovskııdiń «Qyz Jibek» operasyndaǵy Qamqa, A.Jubanov pen L.Hamıdıdiń «Abaı» operasyndaǵy Qarlyǵash, B.Jumanıazovtyń «Mahambet» operasyndaǵy Fatıma, M.Tólebaevtyń «Birjan-Sara» operasyndaǵy Analyq, S.Muhamedjanovtyń «Aısulý» operasyndaǵy Nursulý, E.Rahmadıevtiń «Qamar sulý» operasyndaǵy beıneleri shyǵarmashylyq qyzmetiniń shyrqaý shyńy boldy.
Qurmetti demalysqa shyqqannan keıin Baqyt Áshimova óziniń shyǵarmashylyq qyzmetin Abaı atyndaǵy Qazaq ulttyq akademıalyq opera jáne balet teatrynda repetıtor-ustaz retinde jalǵastyrdy.
Baqyt Áshimovanyń shákirtteri Qazaqstan qalalarynda ǵana emes, shet elderde de jemisti eńbek etip, óner kórsetip júr.
Onyń kópshilikti súı̆sindirgen ásem daýysy, tabıǵı sheberligi klasıkalyq jáne halyqtyq mýzykany súı̆etin kórermenderiniń júreginde máńgi qalady.
Eske salaıyq, Baqyt Áshimova osydan on bir jyl buryn 75 jasqa qaraǵan shaǵynda ómirden ozǵan bolatyn.