Ol aqshaǵa seksýaldyq qyzmet kórsetýge daıyn kelbetti qyzdardy izdep, baı klıentterdi tartýmen aınalysqan.
Jeńgetaı bir saǵattyq quny 500 myń teńgeden bastalatyn «kezdesýden» 40% ózine alyp otyrǵan, dep habarlaıdy Almaty-akshamy.kz
Polisia.kz-tiń aqparatyna saı, İshki ister mınıstrligi áleýmettik jelilerdegi «jabyq» toptardy anyqtady. Olar arqyly Almaty qalasynda qaltaly er adamdar úshin ıntımdik jáne «eskort-súıemeldeý» qyzmetterin kórsetetin modeldik kelbeti bar qyzdardyń qatysýymen «jeke» seks-keshter uıymdastyrylǵan.
İİM uıymdasqan qylmysqa qarsy kúres departamentiniń qyzmetkerleri kóliktegi polısıa departamentiniń UQQKB-men birlesip, sol toptardyń uıymdastyrýshysy men ákimshisi – 25 jastaǵy almatylyq qyzdy ustady.
Ol qyzdarǵa «demeýshilerdi» tabýǵa, álemdi kórýge jáne ómirin jeńildetýge ýáde bergen. Topqa kirý 300 AQSH dollaryn quraǵan. Kórsetilgen jeńgetaılyq qyzmeti úshin kúdikti klıentten túsken aqshanyń 40%-yn ózine alyp otyrǵan. Al qalǵanyn qyzmet kórsetken qyz alǵan. «Kezdesýdiń» quny bir saǵat úshin 500 myń teńgeden bastap, ártúrli baǵamen ólshengen. Qarjy monıtorıńi agenttigimen birlesip, derekterdi taldaý nátıjesinde kúdiktiniń 2022 jylǵy qarajat aınalymy anyqtaldy. Ol 209 mln teńgeden astam somany qurady.
Seks-bıznesti uıymdastyrýshy óz qyzmetin jasyrýǵa tyrysqan. Ózin Instagram áleýmettik jelisinde 100 myńnan astam oqyrmany bar tabysty model ári bloger retinde kórsetken. Resmı túrde esh jerde jumys istemegen. Tintý barysynda kúdiktiden qylmystyq «bıznes» týraly jazbalary bar kúndelik, jańa jáne satyp alynatyn jyljymaıtyn múlikke qujattar, aq tústi untaq zattyń qaldyqtary bar qalta aınasy, esirtki zattaryn tutynýǵa arnalǵan buralǵan aqsha, Lexus ES 250 jáne Toyota Camry 70 markaly avtomashınalar, sondaı-aq salmaǵy 1,72 gram bolatyn «mefedron» tabylyp, tárkilendi.
Sonymen qatar jezókshelikpen aınalysý úshin osy «jabyq» toptarda turatyn «elıtalyq eskortshylar» polısıa bólimine jetkizildi. Prokýratýra kelisimi boıynsha QR QK-niń 309-babymen «Jezókshelikpen aınalysýǵa prıtondar uıymdastyrý jáne jeńgetaılyq» jáne 297-babymen «Esirtki quraldaryn, psıhotroptyq zattardy, olardyń analogtaryn ótkizý maqsatynda zańsyz daıyndaý, qaıta óńdeý, satyp alý, saqtaý, tasymaldaý» sotqa deıingi is qozǵaldy. Kúdikti qamaýǵa alyndy. Tergeý jalǵasýda.