Almatyda máslıhattyń kezekten tys sesıasynda depýtattar qalanyń jańa qurylysy erejelerin bekitti, dep habarlaıdy aqshamnews.kz
Bul erejeler núkteli qurylysqa, taý bókterleriniń, jasyl aımaqtar men aýlalardyń ıgerilýine jol bermeý maqsatynda ákimdik tarapynan ázirlengen. Buǵan deıin qujat sarapshylarmen jáne jurtshylyqpen keńinen talqylanǵan bolatyn.
Máslıhat depýtattarynyń aldynda sóz sóılegen Qalalyq josparlaý jáne ýrbanıstıka basqarmasynyń basshysy Nurlan Boranbaev jańa erejeler qurylysqa qatań shekteýler engizýdi, kóppáterli turǵyn úılerdi qabyldaýda memlekettik organdardyń baqylaýyn kúsheıtýdi, sondaı-aq sáýlet-qurylys baqylaý organdarynyń fýnksıalaryn keńeıtýdi qarastyratynyn atap ótti.
Jańa erejeler qandaı shekteýlerdi kózdeıdi?
Abaı dańǵyly men Ál-Farabı dańǵyly arasyndaǵy qurylysqa bıiktik shekteýi belgilendi: barlyq úlgidegi ǵımarattardyń bıiktigi 9 qabattan jáne 35 metrden aspaýǵa tıis.
Erekshelik tek qoǵamdyq mańyzy bar, sáýlet-ýrbanıstıkalyq negizdemesi bar, jobalyq sheshimderdiń ornyqtylyǵy men ekologıalyq talaptarǵa saı, energıa únemdeý jáne resýrs únemdeý tehnologıalaryn qoldaný arqyly salynatyn biregeı nysandarǵa ǵana jasalady.
Sondaı-aq, jańa erejeler seısmıkalyq qaýipti aımaqtar men taý bókterlerindegi SHAAJ, ál-Farabı dańǵyly, Saın men Jandosov kósheleriniń ońtústigindegi qurylys tártibin retteıdi:
- Taý bókterindegi, sonyń ishinde eńis buryshy 15 gradýstan asatyn aýmaqtarda qurylys salýǵa tyıym salynady;
- Buryn qabyldanǵan ǵımarattardyń bıiktigi 12 metrden jáne 3 qabattan aspaýǵa tıis degen sheshim bekitildi (qoǵamdyq-mádenı nysandardan basqa);
- Qaıta qurý kezinde terasalar men tehnıkalyq qabattardy qaıta jabdyqtaýǵa tyıym salynady.
Buǵan qosa, qalanyń barlyq aýmaǵynda III sanattan tómen emes turǵyn úı salý talaby bekitiledi jáne ár páterge keminde 1 avtoturaq ornyn qarastyrý qajet.
Núkteli qurylysqa jol bermeý jáne rekreasıalyq aımaqtardy saqtaý jónindegi sharalar
Almatyda turǵyn kvartaldar men aýlalarda núkteli qurylystyń salyný máselesi ózekti bolyp otyr. Buryn zańnamalyq turǵyda jasyl aımaqtar men aýladaǵy balalar alańshalarynda qurylys salýǵa tyıym bolmaǵan jaǵdaıda, jańa erejelerde mundaı qurylysqa qatań tyıym salynady.
Sonymen qatar, qalanyń ortalyq magıstraldarynda, áleýmettik nysandar men adamdar kóp jınalatyn oryndardyń mańynda janarmaı quıý beketteri men tehnıkalyq qyzmet kórsetý ortalyqtaryn salýǵa tyıym salynady.
Tabıǵı qorlardy jáne aýlalyq rekreasıalyq aımaqtardy saqtaý maqsatynda qurylys aýmaǵyn keńeıtý úshin tabıǵı landshaftty ózgertýge, taý bókterlerindegi jyralar men jylǵalardy jabýǵa, taý bókterin kesýge tyıym salynady.