Almaty qalasynda tabıǵatty qorǵaý polısıasy Bostandyq aýdany ákimdiginiń qorshaǵan orta jáne ekologıa bólimimen birlesip, ekologıalyq talaptardy buzǵan jáne abattandyrý erejelerin saqtamaǵan qurylys nysanyn anyqtady.
Qurylys alańynda qoqys qaldyqtarynyń shamadan tys jınalýy jáne las qoqysty ruqsatsyz tasymaldaý faktileri tirkelgen. Osyǵan baılanysty ýchaske basshysy Qazaqstan Respýblıkasynyń Ákimshilik quqyq buzýshylyq týraly kodeksiniń 505-babynyń 1-bóligine sáıkes ákimshilik jaýapkershilikke tartyldy, dep habarlaıdy aqshamnews.kz Polisia.kz-ke silteme jasap.
Budan bólek, bolashaqta osyndaı zań buzýshylyqtardyń aldyn alý úshin túsindirý jumystary júrgizildi. Qaldyqtardy óńdeýdegi ekologıalyq talaptardyń buzylýy týraly materıal Almaty qalasynyń Ekologıa departamentine joldandy.
Almaty qalasy polısıa departamenti jergilikti polısıa qyzmeti basqarmasy bastyǵynyń orynbasary Aıtan Eleýsizovtiń aıtýynsha, «Taza Qazaqstan» jalpyrespýblıkalyq baǵdarlamasy men «Almaty – ortaq úıimiz» qalalyq kampanıasy aıasynda qalany abattandyrý jáne ekologıalyq talaptardy saqtaý sharalary kúsheıtilgen.
«Jarqyn kúz» sharasy aıasynda 16 qyrkúıekten bastap qalada abattandyrý erejeleri men sanıtarlyq normalardy buzǵan 2 757 derek tirkelse, qoǵamdyq oryndardy lastaǵany úshin 2 232 hattama toltyryldy. İri kólemdegi qaldyqtardy, synǵan jıhazdardy, turmystyq tehnıka men qurylys qaldyqtaryn jınaqtaǵan 569 azamat ákimshilik jaýapkershilikke tartyldy.
Almatynyń tabıǵatty qorǵaý polısıasy barlyq azamattardy qorshaǵan ortaǵa uqyptylyqpen qaraýǵa jáne qaldyqtardy shyǵarý erejelerin qatań saqtaýǵa shaqyrady. Sebebi tabıǵattyń tazalyǵy men densaýlyǵy árbir adamnyń sanaly áreketine baılanysty.