Almatydaǵy áıgili Medeý muz aıdynynda 660 quraq kórpeni biriktirgen álemdik rekord tirkeldi, dep habarlaıdy aqshamnews.kz
Tańmen jarysyp ulttyq kıim kıgen qolóner sheberleriniń basy qosylyp, Medeýge jınaldy. Belgi berilgen sátte olar ózderimen ala kelgen quraq kórpelerin muz aıdyn ústine jaıýǵa kiristi. Kúnniń nurymen jarqyraǵan túrli-tústi kórpeler teńizdeı qulpyryp, kóz jaýyn alatyn boıaýlar men órnekterdiń keremet úılesimi boldy. Árbir quraq, árbir tigis – sheberdiń júreginen shyqqan óner týyndysy, onyń dúnıetanymy men dástúrge degen súıispenshiligin kórsetti. Qolónerge qyzyǵatyn jurt kóz maıyn taýysyp tikken kórpelerge qyzyǵa qarap, olardyń naqyshyna, oryndaý sheberligine tańdaı qaqty. Bul kúni ulttyq muraǵa degen maqtanysh pen tarıhı sáttiń kýási bolýdyń qýanyshy jurtshylyqqa buıyrdy.
Merekelik is-sharaǵa ónersúıer qaýym, jastar, blogerler men qala qonaqtary kóptep qatysty. Sonymen qatar tikeleı efır uıymdastyrylyp, elimizdiń túkpir-túkpirinen jáne shet elderden de baqylaýǵa múmkindik boldy.
«ALAMAN QURAQ 2025» jobasy – álemde teńdesi joq erekshe mádenı bastama. Bul joly 6 jastaǵy baladan bastap, toqsanǵa taıaǵan qarıalarǵa deıingi ár býyn ókilderi tikken 660 quraq kórpe muz aıdynynyń 1366,8 sharshy metr aýmaǵyn tolyq jaýyp, halqymyzdyń birligi men jylýyn, ulttyq rýhyn beıneleıtin áserli kompozısıaǵa aınaldy. Osylaısha, bul týyndy «Global World Book of Records» kitabyna resmı túrde endi.
– Mundaı kólemdegi etno-rekord Almatyda alǵash ret tirkelip otyr. Qazaqstan atynan Global Book of Records uıymyna ótinim joldanǵan bolatyn. Buǵan deıin mundaı joba elimizde de, álemdik tájirıbede de bolmaǵan soń, bul bastama qoldaý tapty. Sharaǵa elimizdiń 20 óńirinen, onyń ishinde 17 oblys pen respýblıkalyq mańyzy bar Almaty, Astana, Shymkent qalalarynan 660 sheber qatysty. Qatysýshylar barlyq talaptarǵa saı daıyn kórpelerdi alyp keldi (ólshemi, salmaǵy, kestesi, órnegi jáne t.b.). Bul rekord Almatyǵa arnalatyn bolǵandyqtan, kórpelerdiń tústeri de qaladaı jarqyn boldy. Kórmeni sándegen alma pishindi jastyqtar esepke alynbady, biraq merekege sán berdi. Rekordtyń ádil ótýin segiz tirkeýshi baqylady. Sonymen qatar Chehıadan arnaıy tóreshi men Úndistandaǵy tirkeý bóliminiń hatshysy prosesti onlaın rejımde qadaǵalady. Nátıjesinde, Almatyda álemdik rekord tirkelip, aldaǵy on kúnde resmı tizimge enetin bolady, – dedi GLOBAL BOOK OF RECORDS uıymynyń Qazaqstandaǵy ókili Qýandyq Qudaıbergenov.
Jobanyń jetekshisi Nurgúl Abaıhan – ulttyq ónerge janashyr, ıdeıa avtory ári uıymdastyrýshy. Ol bul jobany qazaq qolónerin álemdik deńgeıde tanymal etý maqsatynda qolǵa alǵanyn aıta ketti.
– «ALAMAN QURAQ» jobasy – qazaq halqynyń qonaqjaılyǵy men keńpeıildigin, birligin tanytatyn sımvol. Quraq kórpeniń ózindik baı oıý-órnegi arqyly biz halqymyzdyń tereń mádenıetin jetkizgimiz keledi. Bul joba úshinshi jyl qatarynan júzege asyp keledi. Alǵashynda 200 adam qatysty, ótken jyly Kóshpendiler oıyndarynda 450 sheberdiń qolynan shyqqan kórpeler usynylsa, bıyl Almatyda 660 qatysýshy jınaldy. Qazaq qolóneriniń halyqaralyq deńgeıde moıyndalýy – bizdiń eńbegimizdiń laıyqty baǵalanýy. Barlyq qatysýshylardyń kórpeleri birkelki bolý úshin arnaıy matalar men syzbalar elimizdiń túkpir-túkpirine taratyldy. Tigin jumystaryna alty aı ýaqyt jumsaldy. Búgingi kún – barsha qazaqstandyqtar úshin maqtanysh sáti, – dedi joba jetekshisi.
Pavlodardan kelgen etno-sheber, «Alyp kımeshek» jobasynyń avtory Gúlaıym Aqymbaeva buǵan deıin tórt metrlik ulttyq kımeshek tigip, Global Book of Records tizimine engen bolatyn. Almatyda ótken rekordtyq sharanyń bir bóligi bolǵanyna ol da dán rıza.
– Jahandaný dáýirinde tarıhı tamyrymyzdy umytpaý asa mańyzdy. Quraq kórpe – qazaq mádenıetiniń kórnekti bólshegi. Ol ulttyq maqtanysh pen ózin-ózi taný sezimin nyǵaıtady. Ásirese jastar úshin bul – tamyry tereń dástúrmen baılanys ornatýdyń joly. Osyndaı sharalar arqyly biz óz mádenıetimizdiń baılyǵyn urpaqqa jetkizemiz, – dedi sheber.
Festıvál aıasynda saltanatty marapattaý rásimi ótti, konsert uıymdastyryldy, ulttyq buıymdar kórmesi quryldy. Sharada qazaqtyń halyq ánderi men zamanaýı aranjırovkadaǵy týyndylar shyrqaldy. Ulttyq kıim kıgen bı ujymdary mádenıetimizdi kórsetetin jarqyn qoıylymdar usyndy.
ALAMAN QURAQ 2025 – jaı ǵana rekord emes, ulttyq ónerge serpin bergen mańyzdy mádenı qubylys. Bul joba arqyly qazaq halqynyń qolóneri, sheberligi, birligi men rýhanı murasy búkil álemge tanystyryldy.