Búgín Almatydaǵy Abaı alańynda Ūlttyq dombyra kúníne arnalǵan ashyq aspan astyndaǵy auqymdy merekelík kontsert óttí. Kúı men jyr órílgen ruhanı keshke myńdaǵan qala tūrǵyny men qonaǵy jınaldy.
Kontsertke Qazaqstannyń Eńbek Erí, halyq artısí Asanálí Áshímov, TÚRKSOI janyndaǵy Túrkí memleketterí jazushylar odaǵynyń tóraǵasy Ūlyqbek Esdáulet, Qazaqstannyń eńbek síńírgen qaıratkerí Asyly Osman jáne basqa da zıyaly qauym ókílderí qatysty. Saltanatty keshte sóz alǵan Almaty ákímí Darhan Satybaldy dombyranyń qazaq mádenıetí, ruhanıyaty jáne ūrpaqtar sabaqtastyǵynyń nyshany ekenín atap óttí.
«Dombyra – qazaqtyń jany, júregíníń lúpílí. Onyń qos íshegínde ǵasyrlar syry, babalar ruhy, ūlttyń bolmysy jatyr. Dombyranyń ár pernesí – ótken men búgíndí jalǵastyratyn altyn kópír, ár kúıí – ūrpaqtan ūrpaqqa jetken óshpes mūra. Būl meıram – ūlttyq ruhymyzdy jańǵyrtyp, mádenıetímízdíń tereń tamyryn sezínuge shaqyratyn sát. Qasterlí dombyra ár shańyraqtyń tórínde, ár júrektíń túbínde árdaıym jańǵyryp tūruy, máńgí saqtaluy tıís. Ūlttyq dombyra kúní barshamyzǵa qūtty bolsyn!», - dedí Almaty qalasynyń ákímí Darhan Satybaldy.
Merekelík kontsertte Roza Rymbaeva, Aıgúl Úlkenbaeva, Aıgúl Qosanova, Ramazan Stamǵazıev, Meırambek Besbaev, Asylbek Eńsepov, Móldír Áuelbekova, «Qońyr» men Ulytau toptary, «Sazgen sazy» folklorlyq-etnografıyalyq ansamblí, «Alatau» dástúrlí óner teatrynyń artısterí men basqa tanymal ónerpazdar óner kórsettí.
Keshtíń eń kórkem sharyqtau shegí Nūrǵısa Tílendıevtíń áıgílí «Álqıssa» kúıíníń oryndaluy boldy. Odan keıín ataqty dombyrashylar men olardyń shákírtterí kúı tartys ūıymdastyryp, oryndaushylyq sheberlík pen dástúr sabaqtastyǵyn pash ettí.
Kontsert sońynda Qazaqstannyń halyq artısí Roza Rymbaeva «Dombyra turaly ballada» men «Atameken» ánderín tartu etíp, jınalǵan qauymnyń qūlaq qūryshyn qandyrdy.