Almatyda Abaı atyndaǵy Qazaq ulttyq opera jáne balet teatrynda Qazaqstan Jazýshylar odaǵynyń kezekti HVI quryltaıy ótti.
Quryltaıǵa Jazýshylar odaǵynyń basqarma múshelerimen qatar, elimizdiń barlyq óńirlerindegi músheleri, fılıal dırektorlary, sonymen qatar alys-jaqyn shet elderden qurmetti qonaqtar, óner jáne ǵylym qaıratkerleri qatysty.
100 jylǵa jýyq tarıhy bar Qazaqstan Jazýshylar odaǵy elimizdiń qoǵamdyq, saıası ómirine belsene aralasyp keledi. Búgingi tańda 963 múshesi bar bul odaqtyń el óńirlerinde 19 fılıaly jumys isteıdi.
HVI Jazýshylar quryltaıyna arnaıy kelgen Qazaqstan Jazýshylar odaǵynyń múshesi, QR Aqparat jáne qoǵamdyq damý mınıstri D. Qydyráli Qazaqstan Respýblıkasynyń Prezıdenti Qasym-Jomart Kemeluly Toqaevtyń sıez delegattaryna joldaǵan arnaıy quttyqtaý sózin oqyp berdi.
Sıez qatysýshylary sońǵy ret 5 jyl buryn ótkizilgen quryltaıdan bergi ýaqytta ómirden ótken aqyn-jazýshylardy eske alyp, bir mınýt únsizdik jarıalady.
Sıeziń resmı kún tártibine sáıkes Qazaqstan Jazýshylar odaǵy basqarmasynyń Tóraǵasy – Ulyqbek Esdáýlet atqarylǵan jumystar týraly, Baqylaý-tekserý komısıasynyń tóraǵasy – Álibek Asqarov qoǵamdyq uıymnyń besjyldyq esebi boıynsha baıandama jasady.
Quryltaıdyń jumys tártibi boıynsha Qazaqstan Jazýshylar odaǵy Basqarmasynyń jańa músheleri saılanyp, jabyq daýys berý nátıjesimen Qazaqstan Jazýshylar odaǵynyń tóraǵalyǵyna Qazaqstannyń Eńbek sińirgen qaıratkeri, «Juldyz» jýrnalynyń Bas redaktory Mereke Qulkenovti saılady.
Jańadan saılanǵan Tóraǵanyń usynysymen Basqarma múshelerine Odaq tóraǵasynyń orynbasarlary men hatshylarynyń kandıdatýrasyn usynyp, kópshilik daýyspen Nurjan Qýantaıuly, Baýyrjan Jaqyp, Qasymhan Begmanov, Ǵalym Qalıbek, Beıbit Sarybaı — (jastar jónindegi orynbasary) maquldanyp, bekitildi.
İs-shara sońynda Qazaqstan Jazýshylar odaǵynyń XVI quryltaı qatysýshylaryna arnalǵan Úndeýi oqyldy.