Bıyl áskerı prokýratýra organdarynyń belsendi jumysynyń nátıjesinde somasy 6 mıllıard teńgeden astam múlik memleketke qaıtaryldy.
Bas prokýratýra málimetinshe, Joǵarǵy sotpen quny 5 mıllıard teńgeden asatyn Qorǵanys mınıstrliginiń qorǵanys nysany qaıtaryldy, dep habarlaıdy Almaty-akshamy.kz El.kz-ke silteme jasap.
Almaty qalasynda kólemi 16 myń sharshy metrden asatyn 10 qoımadan, 2 ákimshilik ǵımarattan, 2 óndiristik sehtan turatyn múliktik keshen 20 jyl boıy jeke tulǵanyń senimgerlik basqarýynda bolǵan. Qazirgi ýaqytta qaıta tirkeý rásimi júrip jatyr, odan keıin nysan qorǵanys qajettilikteri úshin paıdalanylady, - delingen málimette.
Sondaı-aq qadaǵalaý aktileri boıynsha quny 180 mıllıon teńge bolatyn 22 jer telimi armıaǵa qaıtaryldy.
Budan bólek 25 jyldan astam zańsyz ıelikte bolǵan, jalpy quny 400 mıllıon teńgeni quraıtyn 200-den astam qyzmettik páter memleket balansyna qoıylyp, olar turǵyn úıge muqtaj áskerı qyzmetshilerge taratylady.