Almaty qalasy boıynsha Memlekettik kirister departamenti 7 sáýirden 26 maýsymǵa deıin Qazaqstan Respýblıkasy Memlekettik qyzmet isteri agenttiginiń Almaty qalasy boıynsha departamentimen birlesip, «Qoldau» aksıasyn qolǵa aldy.
İs-shara qalamyzǵa qarasty 8 aýdanyndaǵy memlekettik kirister basqarmalarynda uıymdastyryldy.
«Ashyq esik kúnin kásipkerlikpen aınalysa bastaǵan adamdarǵa, aýdan turǵyndaryna, salyq zańdylyǵyn túsine almaı júrgen jandarǵa arnadyq. Ákimshilik tarapynan da qyzmetkerlerdi shaqyrdyq. Olarǵa qoıatyn suraqtar bolsa, jaýabyn, sheshimin tapsyn degen nıetpen birlesken aksıa uıymdastyryp otyrmyz. Áleýmettik jeli arqyly «Qoldau» aksıasy jaıly túsindirme jumystaryn júrgizdik. Bir jaǵynan, kópshilikti tolǵandyratyn suraqtarmen tanys boldyq. Aldaǵy ýaqytta qandaı baǵytta jumys jasaý kerektigin ózimizge túrtip aldyq»,–deıdi Almaty qalasy Naýryzbaı aýdany boıynsha memlekettik kirister basqarma basshysy Tóleýhan Kerimbekov.
Aksıaǵa 3827 adam qatysqan olar ózara is-qımyldyń arqasynda qyzyqtyrǵan barlyq suraqtaryna jaýap alyp, sondaı-aq normatıvtik-quqyqtyq jáne zańnamalyq aktilerdiń sapasyn arttyrý boıynsha óz pikirlerimen bólise aldy.
«Birlese ótkizip otyrǵan sharamyz qala turǵyndaryna túsindirme jumystary retinde júrgizildi. Ár aýdanda aptanyń beısenbi kúnderi tańǵy saǵat 9-dan túske deıin túsindirý jumystary uıymdastyryldy. Salyq tóleýshilerge, kásipkerlikti qolǵa ala bastaǵan jandarǵa, aýdan turǵyndaryna aqparattyq kómek kórsettik. Bul «estıtin memleket» tujyrymdamasy sheńberinde keri baılanysty aıtarlyqtaı kúsheıtýge jáne qala turǵyndarynyń suraýlaryna ýaqtyly den qoıýǵa múmkindik beredi. Turǵyndardy mazalaǵan keıbir máseleler departamenttiń baqylaýyna alyndy»,–deıdi Almaty qalasy boıynsha memlekettik kirister departamentiniń memlekettik qyzmet basqarmasynyń memlekettik kórsetýler sapasyn damytý jáne bólim basshysy Indıra Rahımdjanova.
Keńes berý kúnderi halyqqa salyqtyq zańnamalary egjeı-tegjeıli túsindirildi. Búgingi kúni azamattardyń quqyqtyq bilimin arttyrýdyń mańyzy zor deıdi mamandar.
«Memlekettik organdar halyqqa ashyq bolsyn degen nıetpen «Qoldau» aksıasyn uıymdastyrdyq. Bizdiń qyzmet alýshylarǵa halyq úshin jasalyp jatqan sharýalar kómegi tıedi degen oıdamyn. Eki aıdyń ishinde 3000 myńnan astam adam kómek aldy. Qarap otyrsaq, Áýezov, Almaly, Bostandyq aýdandarynyń turǵyndary basqalarǵa qaraǵanda óte belsendi eken. Kelýshilerdiń kópshiligi jeke kásipkerlikti qolǵa alýǵa nıetti ekendigin baıqadyq, qandaı qujattar tapsyrý kerektigin, qaıda tapsyrý qajettigin túsindirip óttik»,–deıdi Qazaqstan Respýblıkasynyń Memlekettik qyzmet isteri agenttiginiń Almaty qalasy boıynsha departamentiniń ókili Maqsat Jańbyrshıev.
«Qoldau» aksıasy aıasynda turǵyndar mynandaı qyzmetterge júgingen.
- Jeke kásipker retinde tirkelýge 647 turǵyn júgingen (16%).
- Salyq eseptiligin tabys etýdi toqtata turýǵa (uzartý, qaıta bastaý) 337 turǵyn júgingen (8%).
- Salyq eseptiligin qabyldaýǵa 318 turǵyn júgingen (10%).
- Salyq eseptiligin keri qaıtaryp alýǵa 296 turǵyn júgingen (10%).
- Qosylǵan qun salyǵyn tóleýshilerdi tirkeý esebi boıynsha 98 turǵyn júgingen (3%).
- Qyzmetti toqtatýǵa 578 turǵyn júgingen (15%).
- Kameraldyq baqylaý habarlamasy boıynsha 789 turǵyn júgingen (20%).
- Salyq salý salasyndaǵy ózge de máseleleri boıynsha 764 turǵyn júgingen (19%).