Almaty qalasyndaǵy Sadu Arena sport kesheninde qol kúresinen eresekter, kadetter, jastar men jasóspirimder arasynda 44-shi álem chempıonaty bastaldy.
Bul týraly Sportty damytý dıreksıasynyń baspasóz qyzmeti málimdedi, dep habarlaıdy Almaty-akshamy.kz.
Álem chempıonatynyń ashylý rásimine Sportty damytý dıreksıasy dırektorynyń orynbasary Álisher Aımuhambetov arnaıy kelip qatysty.
«Mundaı bedeldi jarystar bizdiń elimizde qol kúresti nasıhattaýǵa kúshti serpin beretini sózsiz. Qazaqstandyq sportshylardyń halyqaralyq jarystarda joǵary nátıjelerge qol jetkizgen jetistikteri óskeleń urpaqty sportpen aınalysýǵa, úlken maqsattar qoıýǵa, oǵan qol jetkizýge shabyttandyrady. Barlyǵyńyzǵa sáttilik tileımin», - dedi Álisher Aımuhambetov.
Álemniń 50 elinen ár túrli salmaqtaǵy 1000-nan astam qol kúres sheberleri jınalǵan baıraqty básekede elimizdiń namysyn 178 sportshy qorǵaıdy.
Mádenıet jáne sport mınıstrligi, gir sporty jáne qol kúres federasıasynyń qoldaýymen ótip jatqan chempıonat 3 qyrkúıekke deıin jalǵasady.