Ótken demalys kúnderi Almaty qalalyq PD krımınaldyq polısıa qyzmetkerleri úsh qalta urysyn ustady.
Olardyń barlyǵy qoǵamdyq oryndarda jáne kólikte qala turǵyndarynyń uıaly telefondaryn urlap júrgen, dep habarlaıdy aqshamnews.kz. Polisia.kz-ke silteme jasap.
Belgili bolǵandaı, ustalǵandardyń árqaısysy buryn birneshe ret qylmystyq jaýapkershilikke tartylǵan. Qylmys adamdar kóp jınalatyn jerlerde – bazarlarda, aıaldamalarda, qoǵamdyq kólikterde jasalǵan. Barlyq jaǵdaıda qaskóıler jábirlenýshilerdiń qyraǵylyǵyn joǵaltqan sátin paıdalanyp, jasyryn áreket etken. Almaty polısıasy azamattardy adamdar kóp jınalatyn jerlerde jeke zattaryna, ásirese uıaly telefondaryna, ámıandaryna jáne sómkelerine asa saq bolýǵa shaqyrady.
- Qalta urlyǵy - kóshedegi qylmystyń eń kóp taralǵan túrleriniń biri bolyp qala beredi. Biz mundaı derekterge jedel áreket etemiz, ustalǵandardyń barlyǵy jaýapqa tartylady. Degenmen, qala turǵyndarynyń ózderi saqtyq tanytýy mańyzdy - baǵaly zattaryn artqy qaltalaryna salyp júrmeýi, sómkelerin, ásirese kólikte jáne bazarlarda qadaǵalap otyrýy kerek, - dedi Almaty qalalyq PD krımınaldyq polısıa basqarmasynyń bastyǵy Talant Isaev.
Múliktik qylmystardyń aldyn alý jáne qoǵamdyq qaýipsizdikti qamtamasyz etý - qalalyq polısıa qyzmetiniń basym baǵyty bolyp tabylady.