Qazirgi ýaqytta árbir ekinshi qytaı azamaty artyq salmaqtan zardap shegedi.
Bul jaıynda islam.kz portaly The Washington Post merzimdi basylymyna silteme jasaı otyryp málim etedi, dep habarlaıdy aqshamnews.kz.
Ulttyq deńgeıdegi máselege aınalǵan semizdik indetine baılanysty osydan bir aı buryn ótken Qytaı komýnıstik partıasynyń quryltaıynda artyq salmaqpen kúresýdi ulttyq damýdyń basymdyǵy retinde jarıalandy. Óıtkeni, semizdik ekonomıkaǵa qartaıý prosesi sekildi orasan zor salmaq salady. Artyq salmaqtan bolatyn túrli sozylmaly aýrýlarmen (júrek-qan tamyr aýrýlary, sýsamyr, qaterli isik, t.b.) kúresý óz kezeginde úlken shyǵyndy qajet etpek. Osyny eskergen qytaı basshylary dabyl qaǵa bastady.
Semizdik indeti bul elde shapshań etek alyp keledi: Amerıka qurama shtattarynyń ulttyq densaýlyq saqtaý ınstıtýty semizdikti aýrýlar qataryna jatqyzyp, ulttyq problema retinde tanyǵan 1998 jyly qytaı halqynyń tek 8%-y ǵana artyq salmaqtan zardap shekken eken. Kerisinshe el turǵyndarynyń 10%-y ashqursaq ómir súrgen. Alaıda, ekonomıkanyń ósýimen birge kelgen bul indetten, dáliregi, 27 jyl ishinde artyq salmaqtan búginde árbir ekinshi qytaı azamaty zardap shegedi. Eger jaǵdaı ózgermese, 2030 jyly, ıaǵnı, bir saýsaq sanyna jetetin birer jylda qytaı halqynyń 70%-y artyq salmaqtan zardap shegetin bolady. Osyǵan baılanysty qytaı bıligi densaýlyq salasyna jylyna 4,25 ıýan qarajatty qosymsha bólýine týra keledi. Bul soma densaýlyq salasyna jumsalatyn shyǵynnyń 20%-na teń kórsetkish. Semizdik indetiniń keńinen etek alýyna alańdaǵan jergilikti bılik pen janashyr oryndar túrli sharalar qabyldap jatyr. Máselen, Shenjen ǵylym jáne tehnologıa ýnıversıteti stýdentter arasynda erekshe baıqaý jarıalady – bir aıda bir keliden salmaq joǵaltqandarǵa elektrli massaj qurylǵysyn berýden bastap, qosymsha bilim nesıesin usynyp jatyr.