QR Qarjylyq monıtorıń agenttigi qarjy pıramıdalaryn joıý boıynsha júıeli jumysty jalǵastyrýda.
QMA Almaty qalasy boıynsha departamenti qalalyq prokýratýramen birlesip ońtústik megapolıs aýmaǵynda «Qnet» qarjy pıramıdasyn basqarý faktisi boıynsha kúdiktini ustady, dep habarlaıdy Almaty-akshamy.kz QazAqparatqa silteme jasap.
Ol azamattardan aqsha jınap, bireýiniń jarnalarynyń esebinen basqa qatysýshylardy baıytý maqsatynda qaıta bóldi.
Aıta ketý kerek, «Qnet» qyzmeti jelilik marketıń jáne elektrondyq komersıa túrinde jasyrylǵan. Birqatar shet elderde «Qnet» kompanıasy qarjy pıramıdasy bolyp tanyldy. Sondaı-aq, ony QR Qarjy naryǵyn retteý jáne damytý agenttigi qarjy pıramıdasynyń belgileri bar kompanıalar tizimine engizdi.
Almaty qalasynyń mamandandyrylǵan tergeý soty kúdiktige qatysty 2 aıǵa «qamaýda ustaý» túrindegi bultartpaý sharasyna sanksıa berdi.
QR QPK-niń 201-babyna sáıkes ózge de aqparat jarıa etýge jatpaıdy.
Esterińizge sala keteıik, buǵan deıin elordada osyndaı qarjy pıramıdasyn qurý jáne basqarý faktisi boıynsha kúdikti ustalǵan bolatyn.
QMA azamattardy qyraǵy bolýǵa jáne óz jınaqtaryn kúmándi qarjy uıymdaryna salmaýǵa shaqyrady.
«Eger siz jáne sizdiń jaqyndaryńyz «Qnet» kompanıasynyń qyzmetine tap bolsa, QMA call-ortalyǵyna habarlasýyńyzdy suraımyz», - delingen habarlamada.