Ábilhan Qasteev atyndaǵy QR Memlekettik óner mýzeıiniń 90 jyldyǵyna oraı, «Qazaqstannyń kitap grafıkasyndaǵy ulttyq epos» kórmesiniń ashylý saltanaty ótti.
Bul mańyzdy mádenı is-shara kórermendi kórnekti sýretshilerdiń grafıkalyq týyndylary arqyly qazaq eposy álemine tereń boılaýǵa shaqyrady, dep habarlaıdy aqshamnews.kz.
Kórme Qazaqstannyń ulttyq ádebı jáne kórkemsýret murasynyń mańyzyn kórsetýge, sýretshilerdiń jańa býynyn tárbıeleýge jáne kópshilikti qazaq halqynyń mádenı qundylyqtarymen tanystyrýǵa baǵyttalǵan.
Kórmede 90-ǵa jýyq grafıkalyq jumys pen ulttyq epostyń qazynalaryn saqtaıtyn sırek basylymdar usynyldy. Kelýshiler klasıkalyq oforttan bastap, túpnusqa grafıkaǵa deıingi túrli kórkemdik tehnıkamen jasalǵan batyrlardyń, arýlar men danalardyń jáne mıfologıalyq keıipkerlerdiń beınelerin tamashalady. Ár shyǵarma ulttyq ańyzdardaǵy erekshe oqıǵalar men ondaǵy keıipkerlerdiń obrazyn ashyp, sýretshilerdi ádebı týyndyny tereń túsinýge shabyttandyrady.
Kórmedegi erekshe jumystardyń qatarynda «Qobylandy batyr»,«Qazaq halqynyń epostyq jyrlaryna ılústrasıalar», «Alpamys batyr», «Bozjigit», «Aıman-SHolpan» jáne t.b. jyrlarǵa arnalǵan grafıkalyq paraqtar men ılústrasıalar bar. Olar jumystarynda keıipkerlerdiń emosıasyn áserli jetkizip, shyǵarmalarǵa merekelik kóńil-kúımen qatar ustamdylyq pen maǵynalylyq mazmun bergen.
Joǵaryda atalǵan jáne ózge de kóptegen grafıkalyq týyndylar ǵasyrlar boıy urpaqtan-urpaqqa jalǵasyp, qazaq halqynyń mádenı kody men rýhanı qundylyqtary saqtalǵan epostarǵa jańa kózqaraspen qaraýǵa yqpal etedi.
«Qazaqstannyń kitap grafıkasyndaǵy ulttyq epos» kórmesi kelýshilerge qazaqstandyq sýretshilerdiń sheberligin kórsetip qana qoımaı, ulttyq ańyzdardaǵy ǵashyqtyq, danalyq, batyrlyq ushtasqan baı mádenı murany tamashalaýǵa múmkindik beredi.