Almaty qalasy ákimdiginde «Qaldyqtardy kádege jaratý negizinde elektr energıasyn óndirý» jobasy boıynsha ınvestısıalyq kelisimge qol qoıyldy. Qujatqa Qazaqstan Respýblıkasynyń Ekologıa jáne tabıǵı resýrstar mınıstri Erlan Nysanbaev pen qytaılyq ınvestor – «Junxin Environmental Protection (Almaty)» JSHS qol qoıdy, dep habarlaıdy Aqshamnews.kz.
Almaty ákimi Darhan Satybaldy joba strategıalyq turǵydan asa mańyzdy ekenin atap ótti. Onyń aıtýynsha, elimizdiń eń iri megapolısi úshin bul tek jańa ınvestısıalyq joba ǵana emes, zamanaýı halyqaralyq standarttarǵa sáıkes qaldyqtardy basqarýdyń jańa júıesin qalyptastyrý jolyndaǵy mańyzdy qadam bolyp tabylady.
Ákimniń aıtýynsha, Almatyda jyl saıyn shamamen 1 mıllıon tonna qatty turmystyq qaldyq túziledi. Sondyqtan dál osy qalada mundaı aýqymdy bastamalardy iske asyrýdyń mańyzy zor.
«Jańa ınovasıalyq zaýyt qoqysty polıgondarǵa kómý kólemin aıtarlyqtaı qysqartyp, ekologıalyq jaǵdaıdy jaqsartýǵa múmkindik beredi. Bul joba jasyl ekonomıkany damytýǵa eleýli úles qosyp, qazirgi jáne keler urpaqtyń ıgiligine qyzmet etedi dep senemiz», — dedi Darhan Satybaldy.
Bolashaq zaýyt Qazaqstanda qaldyqtardy energetıkalyq kádege jaratýǵa arnalǵan alǵashqy kásiporyn bolady. Ol zıandy shyǵaryndylardy barlyǵyn tolyqtaı ustap, Eýropalyq odaqtyń ekologıalyq qaýipsizdik standarttaryna saı jumys isteıdi. Kásiporynnyń qýattylyǵy táýligine 1600–2000 tonna qaldyqty óńdeýge eseptelgen. Sonyń nátıjesinde 60 MVt elektr energıasy óndiriledi. Jobanyń jalpy ınvestısıa kólemi 280 mıllıon AQSH dollaryn quraıdy. Zaýyt zamanaýı avtomattandyrylǵan basqarý júıelerimen jáne kópsatyly tazartý keshenimen jabdyqtalady. Bul qorshaǵan ortaǵa túsetin yqpaldy barynsha azaıtyp, ekologıalyq qaýipsizdikti qamtamasyz etedi.
Joba aıasynda qatty turmystyq qaldyqtarmen qatar, medısınalyq jáne qalalyq qaldyqtardy, sondaı-aq kárizdik tazartý qurylystarynan shyqqan tunbalardy keshendi qaıta óńdeý qarastyrylǵan. Onyń bazasynda elektr jáne jylý energıasyn óndirý, jańartylatyn energıa kózderinde derekterdi óńdeý, kadr daıarlaý jáne halyqtyń ekologıalyq saýattylyǵyn arttyrý ortalyǵyn qurý baǵyttaryn damytady. Qurylys kezeńinde shamamen 700 ýaqytsha jumys orny ashylady. Al nysan paıdalanýǵa berilgennen keıin 120-dan astam turaqty jumys orny qurylady.
Qaldyqtardy energetıkalyq kádege jaratý – Qazaqstan Respýblıkasynyń Ekologıalyq kodeksinde aıqyndalǵan negizgi baǵyttardyń biri. Almatyda osy jobany júzege asyrý pılottyq bastamaǵa aınalyp, elimizdiń ózge óńirlerinde de osyndaı óndiristerdi damytýǵa úlgi bolmaq.
Anyqtama úshin:
«Hunan Junxin Environmental Protection» – 2011 jyly qurylǵan jekemenshik qytaı kompanıasy. Ol qatty turmystyq qaldyqtardy basqarý salasynda ekologıalyq turǵydan qaýipsiz sheshimderge mamandanǵan. Kompanıa qyzmetine qaldyqtardy termıalyq qaıta óńdeý, elektr energıasyn óndirý jáne resýrstardy qaıta paıdalaný baǵyttary kiredi. Kompanıa ozyq tehnologıalardy jáne zamanaýı basqarý tásilderin belsendi engizip, operasıalyq tıimdilikti arttyrýǵa ári qorshaǵan ortaǵa yqpaldy barynsha azaıtýǵa umtylady.
2024 jyly Qytaıda 3,2 mln tonna turmystyq qaldyqty qaıta óńdep, 1,473 mlrd kVt⋅saǵ elektr energıasyn óndirdi. Kompanıanyń 400-den astam patenti bar, onyń ishinde shlak, súzgiden ótken sýlar men tamaq ónerkásibiniń qaldyqtaryn kádege jaratý salasyndaǵy patentter de qamtylǵan. 2024 jyldan bastap kompanıa halyqaralyq aýqymyn keńeıtip, basty nazardy Ortalyq Azıa elderine aýdaryp otyr. Qazirgi ýaqytta Qyrǵyzstanda úsh joba iske asyrylý kezeńinde.