Qala aýdandaryn damytý men abattandyrýǵa arnalǵan ótinimder 1 qyrkúıekten bastap 30 qyrkúıekke deıin qabyldanady. Sarapshylar keńesinde qaralyp, daýys berýde kósh bastaǵan jobalardy Almatynyń aýdan ákimdikteri 2026 jyly júzege asyrady, dep habarlaıdy Aqshamnews.kz.
Almatylyqtar óz usynystaryn budget.open-almaty.kz portaly arqyly jibere alady. Ótinimde joba ataýy men sıpattamasy, júzege asatyn mekenjaı, foto nemese syzba, sondaı-aq smeta kórsetilýi tıis.
Jobalarǵa qoıylatyn talaptar:
• Bir avtor – bir ótinim – bir nysan;
• Nysan ortaq paıdalanýǵa arnalýy tıis;
• Joba sol aýdan aýmaǵynda, ortaq paıdalanatyn jerde júzege asyrylýy qajet;
• Ár jobanyń quny 294,9 mln teńgeden aspaýy tıis.
Jobalar myna sanattar boıynsha qabyldanady:
• Kógaldandyrý;
• Jaıaý júrginshi joldaryn abattandyrý;
• Trotýar, pandýs, aryqtardy salý jáne jóndeý;
• Ortaq paıdalanatyn aýmaqtardy jóndeý, jaryqtandyrý;
• Bordúrlerdi, tasjoldy, tireý qabyrǵalardy jóndeý;
• Qoqys úıindilerin joıý;
• Ortaq aýmaqtarǵa besedke, oryndyq, qoqys jáshigin ornatý, balalar oıyny men eresekter demalysyna arnalǵan jabdyqtar qoıý jáne jóndeý;
• Sport jáne balalar oıyn alańdaryn ornatý, jóndeý jáne jaryqtandyrý (aýlalarda jáne ortaq aýmaqtarda);
• Sanıtarlyq tazalyqty qamtamasyz etý.
Ótinimderdi qabyldaý merzimi aıaqtalǵannan keıin sarapshylar keńesi men aýdandyq ákimdikterdiń ókilderi túsken ótinimderdi «Halyq qatysatyn búdjettiń» talaptary men krıterıılerine sáıkestigine, qarastyrylǵan sanattarǵa saı bolýyna, eskız ben boljamdy smetanyń bolýyna qaraı baǵalaıdy.
Qaraý nátıjesinde ár ótinimge úsh mártebeniń biri beriledi: «Daýys berýge jiberildi», «Túzetýge jiberildi», «Qabyldanbady».
«Halyq qatysatyn búdjettiń» barlyq erejelerine sáıkes rásimdelgen ótinimder maquldanyp, daýys berý kezeńine jiberiledi.
Túzetýge qaıtarylǵan joba avtorlary ótinimderin tolyqtyryp, qaıtadan qaraýǵa jibere alady. Túzetý qajettigi týraly habarlama avtorlardyń budget.open-almaty.kz portalynda tirkelý kezinde kórsetken elektrondy poshtasyna joldanady.
Daýys berýge jiberilgen jobalar týraly aqparat budget.open-almaty.kz portalyndaǵy «Jobalar boıynsha materıaldar» bóliminde jarıalanady.
«Halyq qatysatyn búdjetke» qatysty keńes pen qosymsha aqparatty Almaty qalasynyń aýdandyq ákimdikterinen, sondaı-aq Almaty qalasy ákimdiginiń Open Almaty qoǵamdyq qabyldaý ortalyǵynan alýǵa bolady. Baılanys telefony: 224 39 29 (ishki 203).