Qazaq jastary búgínde álemníń túkpír-túkpírínde júrse de, óz elíníń atyn tanytyp, tehnologıya salasynda erekshe tabystarǵa qol jetkízíp júr. Sonyń aıqyn mysaly - AQSh-ta jasandy ıntellektke negízdelgen Call2action.ai startapyn damytyp júrgen jas qazaqstandyq kásípker Ersūltan Júnísaqynov.
Ol bıyl qarashada Memleket basshysy Qasym-Jomart Toqaevtyń AQSh-qa jasaǵan sapary kezínde Prezıdenttíń aldynda óz startabyn tanystyrǵan jas otandastardyń bírí boldy. Onyń jobasy Prezıdenttíń erekshe qyzyǵushylyǵyn tudyryp, qoldau tapqan. Aqshamnews.kz tílshísí Ersūltanmen tíldesíp, onyń startapy, komandasy, maqsattary men Qazaqstannyń tehnologıyalyq bolashaǵy turaly jan-jaqty áńgíme órbíttí.
Call2action.ai - AQSh naryǵyna baǵyttalǵan bíregeı joba
Call2action.aim - Astana Hub tehnoparkíníń rezıdentí jáne álemde jasandy ıntellekt negízínde rekrutıngtí avtomattandyruǵa arnalǵan alǵashqy platforma retínde tanylyp otyr. Keıípkerímíz Ersūltan Júnísaqynov - Call2action.ai kompanıyasynyń negízín qalaushysy jáne bas dırektory (Founder & CEO).
"Dál osy Astana Hub baǵdarlamalarynyń arqasynda bíz 2024 jyly Kremnıı alqabyndaǵy bedeldí Alchemist Accelerator akseleratorynan óttík. Būl bízdíń Call2action.ai jobasyn damytyp, AQSh naryǵyna shyǵuymyzǵa úlken múmkíndík berdí", - deıdí ol.
Būl joba júrgízushílerdí, mehanıkterdí, logıstıka jáne kólík salasynyń qyzmetkerlerín jaldaudy tolyq avtomattandyruǵa baǵyttalǵan. Álemde ázírge dál osy salada balamasy joq būl jobasyn Ersūltan Prezıdentke bıyl osymen ekínshí ret tanystyrǵan.
Búgínde AQSh-taǵy 40-tan astam trakıng kompanıyasy būl ónímge qyzyǵushylyq bíldírgen. Qazírgí tańda ekí tolyqqandy kommertsıyalyq klıent, úsh pılottyq baǵdarlama júzege asyrylyp jatyr.
Suret: keıípkerdíń áleumettík jelídegí paraqshasynan
Tehnologıyanyń erekshelígí nede?
Ersūltannyń aıtuynsha, olardyń AI-ıntervyuerí:
- kandıdatpen "tírí adam" sıyaqty sóılesedí,
- sūraq qoıyp, naqtylap, áńgímelesedí,
- kandıdattyń daǵdysyn 0-10 baldyq shkalada baǵalaıdy,
- rekrutıngtíń negízgí kezeńderín avtomattandyrady.
AQSh trakıng naryǵynda mūndaı keshendí sheshím álí joq. Būl startaptyń basty artyqshylyǵy da - osy.
AQSh-ta damu: ınvestıtsıyalar, klıentter jáne masshtabtau
Joba ózíníń ómírsheńdígín dáleldegennen keıín, komanda ınvestıtsıyalyq raund ashyp, $500 000 kólemíndegí pre-seed ınvestıtsıyasyn tartqan. Kompanıya baǵalauy - 6 mln AQSh dollary.
Investorlar qatarynda:
- amerıkalyq venchurlík qorlar,
- halyqaralyq bıznes-angelder,
- MIT PhD,
- YC túlegí,
- Rippling jáne Workday kompanıyalarynyń keńesshílerí bar.
Call2action.ai búgínde AQSh-ta tolyqqandy íske qosylǵan. Mashtabtau jūmystary, pılottyq jobalar, kelísímsharttar jáne jańa klıenttermen jūmys belsendí túrde júríp jatyr.
Halyqaralyq deńgeıdegí jobanyń negízín qalaǵan - qazaq jastary
Jobanyń barlyq ınjenerlerí men ázírleushílerí - Qazaqstannan shyqqan jas mamandar. Komandada 6 adam bar, bíraq olardyń tájírıbesí halyqaralyq deńgeıde auyz toltyryp aıtuǵa tūrarlyq.
"Eńbekqorlyq, tehnıkalyq jáne tez úırenu qabíletí - qazaq jastarynyń basty artyqshylyqtary", - deıdí Ersūltan.
Suret keıípkerdíń áleumettík jelídegí paraqshasynan
Ersūltannyń jeke joly: Almatydan Kremnıı alqabyna deıín
Ersūltan Almaty qalasynyń tumasy. Tehnologıyaǵa qyzyǵushylyǵy bala kezden bastalǵan. 15 jasynan saıttardy kásíbı baǵdarlamalaudy bílgen. IT jáne e-commerce baǵytynda bírneshe joba jasap kórgen. Al joǵary bílímdí Almatydaǵy energetıka jáne baılanys unıversıtetínde alǵan.
Startaptarǵa qyzyǵushylyǵy naqty máselelerdí tehnologıyamen sheshuge bolatynyn túsíngennen keıín kúsheıgen. Ersūltannyń sózínshe, osyndaı jetístíkke jetuíne ata-anasynyń qoldauy demeu bolǵan. Sebebí, olar onyń tańdaǵan jolyna sením artqan.
Anasy unıversıtette aǵylshyn tílí páníníń oqytushysy, al ákesí qazír Ersūltannyń alǵashqy kompanıyasynda jūmys ísteıdí eken.
"Olar maǵan eńbekqor boludy, adaldyqty jáne qıyndyqqa qaramaı alǵa júrudí úırettí", - deıdí ol.
Jahandyq naryqtaǵy qazaqtar: kímder ne ístep júr?
Ersūltannyń aıtuynsha, búgínde AQSh-ta AI, fınteh, logıstıka, HR-tech baǵytynda startap qūrǵan qazaqtar kóp. Google, Apple, Meta, Tesla, Amazon sıyaqty alyp kompanıyalarda jūmys ísteıtín qazaqstandyqtar da barshylyq.
"Meníń bír qazaq dosym Tesla kompanıyasynda bas tehnıkalyq ınjener qyzmetín atqarǵan. Mūndaı deńgeıdegí ınjenerler búkíl álemde bar bolǵany 15-20 adam, jáne sol topta qazaq mamanynyń boluy - bízdíń jastardyń álemdík deńgeıde básekege tolyq qabílettí ekenín dáleldeıdí", - deıdí Ersūltan Júnísaqynov.
Būl - qazaq jastarynyń álemdík deńgeıde básekege qabílettí ekeníníń anyq dálelí.
Qazaqstanda qandaı salalarǵa AI engízuge bolady?
Call2action.ai aldymen rekrutıngtí avtomattandyrsa, keıín úsh írí salaǵa keńeıtu josparlanyp otyr:
1. HoReCa
- dayashylar,
- aspazdar,
- barmender,
- qonaqúı qyzmetkerlerí.
Būl salada kadr tūraqsyzdyǵy joǵary.
2. Rıteıl
- kassırler,
- satushylar,
- qoıma qyzmetkerlerí.
Mausymdyq ózgerísterge baılanysty mamandardy jyldam auystyru kerek boluy ábden múmkín.
3. Qoıma logıstıkasy
- júk tasushylar,
- operatorlar,
- skanerleushíler.
Kóp kompanıyalar bír uaqytta júzdegen qyzmetker ízdeıdí.
"Būl salalarda AI naqty tıímdílík bere alady, - deıdí Ersūltan.
Qazaqstanda startap júıesín qalaı jaqsartuǵa bolady?
Ersūltannyń píkírínshe, ol úshín úsh basty baǵyt mańyzdy:
- Kóbírek venchurlík qorlar qūru
Startaptar qarjyǵa qatty mūqtaj. - Álemdík deńgeıdegí akseleratorlardy damytu
Alchemist, YC, Techstars - Qazaqstanda osy deńgeıdegí baǵdarlamalar kerek. - Injenerlík unıversıtetterdí kúsheıtu
MIT úlgísíndegí zertteu ortalyqtary qajet. - Mektepten bastap programmalau men AI oqytu
"Balalardy erte jastan kod jazuǵa, algorıtmdík oılauǵa jáne jasandy ıntellekt negízderíne úıretu - bolashaq ınjenerler men faunderler sanyn aıtarlyqtaı arttyrady. Eger osy tetíkter júzege assa, Qazaqstan naǵyz álemdík deńgeıdegí tehnologıyalyq ortalyqqa aınala alady", - dep boljaıdy startaper.
Bolashaq jospar: AQSh-ta mıllıardyq kompanıya qūryp, Qazaqstanda 1000 jūmys ornyn ashu
Ersūltannyń osy kúní maqsaty aıqyn. Ol keleshekte AQSh-ta unicorn deńgeıíndegí kompanıya qūrǵysy keledí. Osyndaı deńgeıge jetken kezde Qazaqstanda 1000-nan astam jańa jūmys ornyn ashu oıy da bar eken. Osy arqyly eldíń tehnologıyalyq salasyna úles qosuǵa nıettí.
Startaperdíń būl oıy júzege assa, bolashaqta osyndaı jūmys oryndarynda:
- ınjenerler,
- baǵdarlamashylar,
- AI/ML mamandary,
- data analyst jáne data engineer sıyaqty joǵary jalaqysy bar mamandyqtar bolmaq.
Ersūltan Júnísaqynovtyń joly kóp qazaq jastaryna úlgí bolarlyq.
Almatydan bastalǵan qarapaıym arman, eńbekqorlyq pen tabandylyqtyń arqasynda búgínde qazaq startapshysy AQSh naryǵynda básekege túsíp, álemdík deńgeıdegí óním jasap otyr.
Ózíníń aıtuynsha:
"Bálkím, bíreuge qıyn shyǵar. Bíraq bárí múmkín. Startap qūru da, AQSh naryǵyna shyǵu da, úlken kompanıyalarmen jūmys ísteu de - arman emes, naqty maqsat"
Qazaqstannan álemdík deńgeıge shyǵatyn talanttar kóp. Al Ersūltannyń tabysy - sol úlken joldyń jarqyn mysaly.
