Almaty ınjenerlík-kommunıkatsıyalyq ınfraqūrylymdy jan-jaqty jańartudy qolǵa alyp, jylu, elektr, su qūbyry men káríz jelísín qaıta jańǵyrtyp, strategıyalyq mańyzy bar su qabyldau nysandaryn sala bastady. Óńírlík kommunıkatsıyalar qyzmetínde qala ákímíníń orynbasary Almashan Smatlaev osylaı dep, qaladaǵy júıelerdíń tūraqtylyǵyn arttyryp, qysqy kezeńge qamdanu úshín bıyl bíraz jūmys bítkenín atap óttí.
Almashan Smatlaevtyń aıtuynsha, bıyl 39 shaqyrym jylu jelísí men 17 qazandyq qaıta jańǵyrtylǵan. Būl jylu jelíleríníń tozuyn 56,1%-dan 54,3%-ǵa, qazandyqtardyń tozuyn 65,1%-dan 62,1%-ǵa tómendetuge múmkíndík berdí. Elektr jelísín de qatar jańartyp jatyr: 221 shaqyrym jelí jańaryp, jyl sońyna deıín būl kórsetkísh 238 shaqyrymǵa jetpek.
330,7 shaqyrym su qūbyry da salynyp, 60 shaqyrymy jańǵyrǵan. Sonyń arqasynda qūbyrdyń tozuy byltyrǵy 53,8%-ben salystyrǵanda 51%-ǵa tómendedí. Su būru júıesínde 306,4 shaqyrym káríz jelísí salynyp, 5,5 shaqyrymy jańardy, būl da tozu deńgeıín 49,5%-ǵa tómendetíp otyr.
Ákímníń orynbasary jańa su qabyldau nysandaryn saluǵa erekshe toqtaldy. Onyń aıtuynsha, «Aksaı» su qabyldaǵyshy 95%-ǵa daıyn, ol batys pen tauǵa írgeles audandardaǵy shamamen 140 myń tūrǵyndy sumen qamtamasyz etedí. Jauyn-shashyndy kezeńdegí íske qosu-retteu jūmysy ayaqtalǵannan keıín, nysandy 2026 jyldyń mamyr aıyna taman íske qospaq oıda. «Ermensaı» su qabyldaǵyshy 2026 jyldyń qarashasynda ayaqtalyp, Bostandyq audanynyń ońtústík-shyǵys bólígín sumen qamtıtyn bolady.
Apattyq jaǵdaıǵa qatysty píkírínde Smatlaev 13 qarashada Alatau audanyndaǵy jaryqtyń óshíp qalǵanyn da mysalǵa keltírdí. Gaz qūbyryn tóseu kezínde merdíger 110 kV kabeldí zaqymdap, 32 myńnan astam adam jaryqsyz qalǵan. Alaıda apat bír táulíkte tolyq joıylyp, 64 mln teńge kólemíndegí shyǵyndy kínálí ūıym óteıtín bolyp ūıǵaryldy.
Ákímníń orynbasary merdígerlerge baqylau kúsheıíp jatqanyn atap óttí: bíraz kompanıyanyń lıtsenzıyasy qaıtaryp alyndy, sotqa 30 talap-aryz daıyndalyp, endí barlyǵyn salalyq basqarmalarmen kelísíp ístemekshí.
«Bíz jūmystyń sapasy men merzímín qamtamasyz ete alatyn myqty, tártíptí merdígerler pulyn qalyptastyryp jatyrmyz. Almatynyń ınfraqūrylymy senímdí árí kelesí ondaǵan jylǵa eseptelgen boluy tıís», – deıdí Alıhan Smatlaev.