Memlekettik keńesshi Erlan Qarın kitap oqý mádenıetin damytý qajetin jáne bul qoǵamnyń ortaq mindeti ekenin aıtty, - dep habarlaıdy aqshamnews.kz tilshisi.
Bul týraly ol áleýmettik jelidegi jazbasynda bólisti.
"Jýyrda "Jas Alash" gazetinde jarıalanǵan bir materıalǵa kózim tústi. Taqyryby - "Kitap oqymaıtyn qoǵam: Jalǵan statısıkaǵa jasyrynǵan shyndyq". Talqyǵa baspager Shyńǵys Muqan, jazýshy-baspager Arman Álmenbet, kitaphana qyzmetkeri Aıdos Bektursyn ún qosypty. Kóterilgen másele shynynda da ózekti. Jurtshylyqty, ásirese jas jetkinshekterdi áleýmettik jeliniń jetegine jibermeı, kitap oqýǵa baýlý - bárimizge ortaq is, ortaq jaýapkershilik. Sondyqtan bul baǵyttaǵy kez-kelgen ıdeıa, kez-kelgen bastama qoldaýǵa laıyqty. Kitap oqý mádenıetin damytý, kitapqumar qoǵamǵa, oqý-bilimge qushtar ultqa aınalý - búgingi kúnniń basty talaby. Memleket basshysy aıtqandaı, "Ozyq oıly ult bolýdyń tóte joly - kitap oqý". Bul - dáleldeýdi qajet etpeıtin aksıoma", - dedi ol.
Sonymen qatar, Erlan Qarın "memleket eshkimdi kitap oqýǵa mindetteı almaıdy" degen ustanymyn da naqty jetkizdi. Onyń paıymynsha, bıliktiń basty mindeti - kitap oqýǵa qolaıly alǵysharttar qalyptastyrý. Iaǵnı, oqyrman suranysyn qanaǵattandyratyn sapaly kitaptar shyǵarý, sheteldiń úzdik týyndylaryn aýdarý, oqý keńistigin keńeıtý, bilim men kitap oqýdy nasıhattaý, yntalandyrý.
Osy rette Qarın keıingi jyldary qolǵa alynǵan birqatar bastamany atap ótti: Prezıdent bastamasymen 23 sáýir Ulttyq kitap kúni bolyp bekitildi, árbir qazaqstandyq oqýǵa tıis 100 kitaptyń tizimi jasaldy, "Balalar kitaphanasy" jobasy iske qosyldy, Amanat partıasy "Kitap-Amanat" jobasyn júzege asyryp jatyr. Almatydaǵy birneshe kitaphananyń oqý zaly táýlik boıy - 24/7 rejıminde jumys isteı bastady, sondaı-aq Prezıdent ıdeıasy boıynsha táýlik boıy jumys isteıtin zamanaýı kitaphananyń qurylysy josparlanyp otyr.
Memlekettik keńesshiniń málimetinshe, búginde kópshilikke arnalǵan kitaphanalardyń qorynda 72 mıllıonnan asa qujat bar, bıyl olardyń qory 1 029 568 jańa basylymmen tolyqqan. Sıfrly formattaǵy resýrstar da artyp keledi: kitaphanalarda 2,2 mıllıonnan asa elektron ónim tirkelgen, onlaın oqýǵa arnalǵan túrli platformalar jumys isteıdi.
"Qysqasy, oqımyn degen janǵa múmkindik mol, tıisti jaǵdaı jasalǵan. Endi jappaı kitap oqý mádenıetin qalyptastyrsaq nur ústine nur bolar edi", - dep jazady Erlan Qarın.
Onyń aıtýynsha, endigi mańyzdy qadam - kitapqa qoljetimdilikpen qatar, qoǵamda kitap oqýdy mártebe etetin orta qalyptastyrý, kópshilikke úlgi bolar oqyrman býynyn ósirý.
"Sondyqtan qoǵamdyq deńgeıde kitapqa degen qoljetimdilik pen qyzyǵýshylyqty arttyrý, kópshilikke úlgi bolatyn oqyrmandar ortasyn qalyptastyrý mańyzdy. Bul - bárimizge ortaq is", - dep túıindedi Memlekettik keńesshi.