2026 jylǵa arnalǵan jergilikti búdjettiń kirisi 2,5 trln teńge kóleminde josparlanǵan. Bul týraly qala ákimi Darhan Satybaldy máslıhattyń kezekten tys XXIX sesıasynda málimdedi.
Onyń aıtýynsha, qalanyń ekonomıkalyq ósimimen birge jergilikti búdjetke túsetin qarajat ta turaqty oń dınamıka kórsetip keledi. Búginde Almaty búdjeti negizinen jergilikti túsimder esebinen qalyptasady. Qala respýblıkalyq búdjettiń negizgi donorlarynyń biri bolyp qala beredi, jalpy kiristiń besten birinen astamyn qamtamasyz etip otyr. Sonymen qatar, qala búdjetinen alynatyn qarajat kólemi aıtarlyqtaı artqan: 2025 jyly 250 mlrd teńgeden 2026 jyly 491 mlrd teńgege deıin ósedi.
"Jalpy, aldaǵy úsh jylda respýblıkalyq búdjetke shamamen 1,8 trln teńge aýdarylady. Bul aldyńǵy úsh jyldyq kezeńmen salystyrǵanda 2,6 ese kóp. Qarjylyq júktemeniń artýyna qaramastan, biz jergilikti búdjet qarajaty esebinen, sondaı-aq qaryz tartý arqyly aýqymdy ınvestısıalyq jobalardy iske asyrýdy bastaımyz", - dedi Almaty ákimi.
2026 jyly jergilikti búdjettiń shyǵysy 2,8 trln teńge kóleminde josparlanǵan, onyń úshten biri - 850 mlrd teńge ekonomıkalyq ósimdi yntalandyrýǵa baǵyttalady.
"Aıta ketý kerek, bıyl qazirgi shyǵystardy ońtaılandyrý jumystary júrgizilip, onyń nátıjesinde qarajatty damý búdjetine qaıta bólýge múmkindik týdy", - dep sózin qorytyndylady Darhan Satybaldy.