Birinshi Qazaqstan IGF 2023: 18 qazanda ınternetti basqarý jónindegi ulttyq forým Almaty qalasynyń jetekshi IT habynda, SmArtPoint-te ótedi. Bul mańyzdy oqıǵa Qazaqstanda ashyq jáne qaýipsiz sıfrlyq keńistiktiń qurylýyna yqpal etedi, dep habarlaıdy almaty-akshamy.kz.
Birikken Ulttar Uıymynyń (BUU) Bas hatshylyǵynyń qoldaýymen ótkiziletin ınternetti basqarý jónindegi jahandyq forýmnyń (The Internet Governance Forum, IGF) bóligi sanalatyn IGF ulttyq bastamalary tórt qurlyqtaǵy 85 elde jáne 17 aımaqta usynylǵan. Ulttyq bastama kópjaqty dıalog qurýdy yntalandyrady jáne BUU-nyń #9 "Ónerkásip, ınovasıa jáne ınfraqurylym" jáne #17 "Turaqty damý múddesindegi áriptestik" turaqty damý maqsattaryna sáıkes keledi.
Qazaqstan IGF - memlekettik organdar, jeke sektor, azamattyq qoǵam jáne akademıalyq ortanyń 200-den astam ókiliniń ınternet pen kıberqaýipsizdikke qatysty kóptegen máseleni talqylaıtyn jyl saıynǵy biregeı ulttyq forýmy.
Atap aıtqanda, sharada mynadaı taqyryptar qamtylady:
● Turaqty damý maqsattaryn (TDM) iske asyrý tásili retinde ınternetti jan-jaqty paıdalaný;
● Algorıtmder men jasandy ıntellekt dáýirindegi sóz bostandyǵy;
● Sıfrlyq zańnamany kodıfıkasıalaý;
● Sandyq aktıvter jáne blokcheın;
● Telekomýnıkasıa salasynyń sıfrlyq transformasıasy;
● Qazaqstandaǵy derekter naryǵyn damytý jáne retteý;
● Onlaın platformalardy ulttyq retteý;
Budan bólek, forýmda Digital Rights Center Qazaqstan (DRCQ) zań fırmasynyń sarapshylary qurastyrǵan Qazaqstannyń onlaın platformalarynyń "Sıfrlyq quqyqtardy saqtaý reıtıńisi 2023" nátıjeleri kópshilik nazaryna usynylady. Sharada sondaı-aq Qazaqstan Respýblıkasy sıfrlyq damý, ınovasıalar jáne aeroǵarysh ónerkásibi mınıstrliginiń Aqparattyq qaýipsizdik jónindegi komıteti (QR SDIAÓM AQK) men Qyrǵyzstan jáne Rýmynıanyń derbes derekterdi qorǵaý máseleleri jónindegi ulttyq retteýshiler arasynda kópjaqty memorandým jasalady degen jospar bar.
Qazaqstan IGF 2023 Birikken Ulttar Uıymy Bas hatshylyǵynyń resmı qoldaýymen Eurasian Digital Foundation, DRCQ, QR SDIAÓM AQK, Level 2, "Digital paradigm", Blockchain KZ, Maqsut Narikbayev University birlesip ótkiziledi.