1995 jylǵy 7 sáýir – tájik-aýǵan shekarasynda Qazaqstan Respýblıkasy İshki ister mınıstrligi İshki áskeriniń 17 jaýyngeri erlikpen qaza tapqan tarıhı kún. Bıyl osy qaıǵyly ári qaharmandyq oqıǵaǵa 30 jyl tolyp otyr, dep habarlaıdy aqshamnews.kz.
Almaty qalasyndaǵy 3650 áskerı bóliminiń aýmaǵynda tájik-aýǵan shekarasynda qyzmet babynda qaza tapqan sarbazdarǵa arnalǵan eskertkish taqta ashyldy. İs-sharaǵa Ulttyq ulannyń «Ońtústik» óńirlik qolbasshylyǵynyń jáne 3650 áskerı bóliminiń basshylyǵy, sol bir tarıhı mısıaǵa qatysqan ardagerler, jergilikti atqarýshy bılik ókilderi, oqýshylar men áskeır bólimniń jeke quramy qatysty.
Shara barysynda qatysýshylar eskertkish aldyna gúl shoqtaryn qoıyp, bir mınýt únsizdikpen bozdaqtardyń rýhyna taǵzym etti. Áskerı orkestrdiń oryndaýynda Memlekettik Gımn shyrqaldy. Jınalǵan qaýym aldynda Qazaqstan Respýblıkasy Ulttyq ulany «Ońtústik» óńirlik qolbasshylyǵynyń qolbasshysy general-maıor Talapker Ámireevtiń atynan ardagerlerge alǵys sóz oqylyp, erlik pen eldik týraly estelikter aıtyldy.
– Bizdiń býynnyń óz mısıasy boldy. Biz antymyzǵa adal boldyq. Jaýyngerlik tapsyrmalardy oryndaý kezinde qarýlas joldastarymyz kóz jumdy. Olardyń erligi eshqashan umytylmaýy tıis, – dedi qandy shaıqastyń kýágeri Janat Nesipov sol kúnderdi eske alyp.