Abaı atyndaǵy Qazaq ulttyq pedagogıkalyq ýnıversıtetinde Abaı Qunabaıulynyń 180 jyldyq mereıtoıy aıasynda dástúrli Ǵylym aptalyǵynyń ashylý saltanaty ótti.
Memleket basshysy Qasym-Jomart Toqaev Ulttyq quryltaıdyń IV otyrysynda: «Biz ǵylymdy damytýda, sonyń ishinde qoldanbaly zertteýler júrgizý úshin kóp jumys istep jatyrmyz. Ǵylymı jańalyqtardy komersıalandyrýǵa, ǵylym men óndiristiń baılanysyn kúsheıtýge basa mán berilip otyr», - dep atap ótkendeı, búginde álemniń aldyńǵy qatarly elderi ǵylym salasynyń damýyna basymdyqtar berip otyr. Al QR Ǵylym jáne joǵary bilim mınıstrliginiń elimizdegi jetekshi joǵary oqý oryndaryn avtonomdy baǵytqa burýy jáne oqý oryndary janynan ǵylymı-zertteý ortalyqtarynyń qurylýy ǵylymdy damytýda negizgi kúshke aınaldy.
Atalǵan baǵytta uıymdastyrylǵan is-sharaǵa ýnıversıtet basshylyǵy, fakúltet dekandary, profesorlyq-oqytýshylar quramy jáne jas zertteýshiler keńesi men ǵylymı qyzmetkerler, belsendi stýdent jastar qatysty.
Sharanyń ashylý saltanatynda alǵy sóz sóılegen ýnıversıtet Basqarma tóraǵasy-rektor Bolat Tilep aptalyqtyń ashylýy uly aqyn, aǵartýshy, oıshyl Abaı Qunanbaıulynyń 180 jyldyq mereıtoıymen tuspa-tus kelip otyrǵandyǵyn aıta kele, Abaı shyǵarmalarynyń basty ıdeologıalyq qazyǵy – «Qalyń eli, qaıran jurty qazaǵynyń» boıyndaǵy kemshilikterdi joıyp, ǵylym-bilimdi meńgergen, «aqyl, qaırat, júrekti» birdeı ustanǵan, «bes nárseden qashyq, bes nársege asyq» bolǵan, bereke-birligi jarasqan, oı-órisi damyǵan halqynyń bolashaǵy, tálim-tárbıesi, ǵylym-bilimi ekendigin atap ótti.
- «Elimizdegi joǵary oqý oryndarynyń aldynda úlken mindet tur - ýnıversıtettik ǵylymdy damytý. Árıne, ǵylym bir kúndik, bir aılyq, bir aptalyq, bir jyldyq másele emes. Ol ýnıversıtetimizdiń kúndelikti jumysyndaǵy - úlken áleýet. Ýnıversıtetimiz búginde ǵylym keńistiginde ózindik ornyn naqtylady. Bilim jáne ǵylym salasynda birqatar jetistikterge qol jetkizip, bıik belesterdi baǵyndyrýda. Dástúrli túrde uıymdastyrylatyn Ǵylym aptalyǵynyń ár jylda bir ózindik ereksheligi bar. Bıylǵy aptalyqtyń ashylýy uly aqyn, aǵartýshy, oıshyl Abaı Qunanbaıulynyń 180 jyldyq mereıtoıymen tuspa-tus kelip otyr. Sondyqtan Ǵylym aptalyǵyn uly Abaıdyń 180 jyldyǵyna arnaıy arnap otyrmyz. Odan bólek, ýnıversıtetimizde sońǵy bir jylda jasaqtalǵan ǵylymı-ınnovasıalyq park ashylǵaly otyr. Bul parktyń aıasynda birneshe jańa zerthanalar jumysyn bastaıtyn bolady. Munda bolashaq pedagogter men zertteýshiler sıfrlyq oqytý ádisterin meńgerip, ınovasıalyq jobalarmen aınalysa alady. 100 jyldyq tarıhy bar ýnıversıtetimizdiń ǵylymı potensıaly, áleýeti óte joǵary. Bizdiń qazirgi mindetimiz ári maqsatymyz osy potensıaldyń sabaqtastyǵyn saqtaı otyryp, odan ári damytý. Bul árıne, eń birinshi kezekte jas ǵalymdardy qoldaý máselesine tikeleı táýeldi. Sondyqtan da, bıylǵy Ǵylym aptalyǵynda bilim alýshylardyń ǵylymdaǵy talpynystaryna qoldaý kórsetý, olardy ǵylymı izdenisterge qyzyqtyrý maqsatynda aptalyq aıasynda 120-ǵa jýyq úlkendi-kishili is-shara josparlandy. Bul sharalardyń árqaısysy bizge óte mańyzdy. Onyń ishinde halyqaralyq ǵylymı-praktıkalyq konferensıalar, jas ǵalymdar arasyndaǵy baıqaýlar, semınarlar men trenıńter, sheteldik sarapshylardyń dárister serıasy, Ted formatyndaǵy kezdesýler bar. Osy tusta Abaı Ýnıversıtetiniń janynan ashylǵan «Abai Labs» ǵylymı-ınnovasıalyq parkine qarasty laboratorıalardyń da qarqyndy jumys istep jatqandyǵyn aıtyp ótýge bolady. Búgin osy saltanatty sharanyń jalǵasy retinde «Abai Labs» ǵylymı- ınovasıalyq parkinen jańa zerthananyń ashylý saltanaty ótedi», - dedi rektor.
İs-shara barysynda «Abai Labs» ǵylymı-ınnovasıalyq parkine qarasty «Bilim berýdegi VR/AR tehnologıalary» ǵylymı zerthananyń ashylý rásimi ótti. Bul zamanaýı bilim berý tehnologıalaryn damytýǵa baǵyttalǵan mańyzdy qadam. Zerthana jańa býyndy vırtýaldy jáne tolyqtyrylǵan shynaıylyq tehnologıalaryn bilim berý úderisine engizýge arnalǵan.
Odan bólek, QR UǴA akademıgi Mámbet Qoıgeldıevtiń ǵylymı jetekshiligimen daıarlanǵan 12 tomdyq «Alashorda isi. 1920 - 1940 jj. Qujattar men materıaldar» jınaǵynyń tusaý keseri, Abaı Qunanbaıulynyń 180 jyldyǵyna oraı «Abaı murasy - rýhanıat qazynasy» ǵylymı semınary, Abaı Innovation Fest: Inovasıalyq jobalar men startaptar kórmesi jáne taǵy basqa ǵylymı, ádistemelik semınarlar men dárister ótti.
Aıta keteıik, oqý ornynyń ǵylymı áleýetin damytý maqsatyndaǵy is-sharalar legi 14 sáýirge deıin jalǵasyp, aptalyq aıasynda 120-ǵa jýyq is-shara uıymdastyrylady. Olardyń qatarynda sheteldik jáne otandyq joǵary oqý oryndary ǵalymdary men izdenýshileriniń qatysýymen túrli baǵyttaǵy jıyndar, halyqaralyq ǵylymı-praktıkalyq konferensıalar, jas ǵalymdar arasyndaǵy baıqaýlar, semınarlar men trenıńter, sheteldik sarapshylardyń dárister serıasy, Ted formatyndaǵy kezdesýler bar.
Baspasóz qyzmeti