Mamandar qala turǵyndaryna aýa raıyna baılanysty keńes berdi.
Aýa raıyn zertteýshilerdiń boljamy boıynsha, aldaǵy kúnderi eki táýlik boıy Almatyda qalyń qar jaýyp, aýa temperatýrasy túnde 18, kúndiz 15 gradýsqa deıin tómendep, aıaz bolady dep kútilýde. Sınoptıkter odan keıingi kúnderi 25 gradýsqa deıingi qatty aıaz bolatynyn eskertip jatyr.
Osyǵan oraı keshe Áleýmettik qyzmetter úıinde Almaty qalasy Komýnaldyq ınfraqurylymdy damytý basqarmasynyń mamandary jýrnalıserge arnap suhbat berdi. Onda aldaǵy kúnderdegi kún raıynyń sýytýyna baılanysty qalada atqarylatyn jumystar týraly aıtyldy.
Almaty qalasy Komýnaldyq ınfraqurylymdy damytý basqarmasy kóriktendirý bóliminiń basshysy Aıdyn Qalabaevtyń aıtýynsha, búginde qalanyń komýnaldyq qyzmetteri kúsheıtilgen rejımde jumys jasap, óndiristik bazalarda táýlik boıy kezekshilikter uıymdastyrylýda. Ótken jyly qysta qala boıynsha 45 myń tekshe metr qar shyǵarylǵan. Al bıyl 1 qańtardan bastap búgingi kúnge deıin 62 myń tekshe metr qar qala syrtyna jóneltildi. Sala mamandary kún sýytqan kezde almatylyqtarǵa meılinshe jyly kıinip júrýine, al avtokólik tizgindegenderge jyldamdyqty barynsha azaıtyp, asqan saqtyqpen kólik júrgizýge keńes berdi. Sonymen qatar, qalany qardan tazalaý kezinde jol jumysshylarynyń eńbegine qurmetpen qarap, olardyń jumysyna kedergi keltirmeýlerin surady.
– Aldaǵy kúnderi qalada eki kún boıy qalyń qar jaýyp, aýa raıy kúrt sýytady dep kútilýde. Osyǵan oraı qala joldarynda júrgizýshilerge jyldamdyqty azaıtyp, kólik arasyndaǵy araqashyqtyqty ulǵaıtýǵa keńes beremiz. Al jaıaý júrginshilerdi trotýarlarmen júrgende abaı bolýlaryn suraımyz. Jumysqa keshigýdiń aldyn alý úshin úıińizden erterek ári jyly kıinip shyqqandaryńyz durys, - dedi Aıdyn Aıdaruly.
Qar tazalaý jumystary qalaı júrgiziledi?
Jýrnalıserdiń qoıǵan saýalyna Almaty qalasy Komýnaldyq ınfraqurylymdy damytý basqarmasy kóriktendirý bóliminiń bas mamany Sergeı Vıktorov jaýap berdi:
– Qar tazalaý tehnologıasy boıynsha tazalyq jumystary bastalmas buryn, aldymen kóshelerge kóktaıǵaqqa qarsy arnaıy tehnıkalyq tuz qospalary sebiledi. Bul jumystar qardyń asfált jabynyna jabysyp, qatyp qalmaýy úshin júrgiziledi. Sondyqtan qar jaýa bastaǵan kezde, «Gıdromettiń» eskertpelerine sáıkes, belgilengen oryndarda tuz, qum sekildi qospa sebetin arnaıy tehnıkalar aldyn ala daıyn turady. Ár tehnıka ózine belgilengen baǵyt boıynsha jumys jasaıdy. Arnaıy qospalar sebilgennen keıin joldardaǵy qarlar erı bastaıdy. Mine, osy kezde kóshelerdegi tazalyq jumystary bastalady. Keıde qala turǵyndarynan kósheler qardan tazalanbaı jatyr dep kóp shaǵym túsip jatady. Qar tazalaý ońaı jumys emes. Sondyqtan biz almatylyqtardan jumysshylarǵa meılinshe túsinistikpen qaraýdy suraımyz, - deıdi ol.
Bas mamannyń aıtýynsha, eger qar qalyń jaýsa, qospalardy sebý jumystary ár 5 mınýt saıyn qaıtalanady. Jumysshylar qarlardy aldymen sypyryp, kóshe boılaryna úıip shyǵady. Sodan keıin baryp qana arnaıy tehnıkalarǵa tıelip, qala syrtyna shyǵarylady. Jalpy, qalanyń komýnaldyq qyzmetteri megapolısti qardan tazalaýǵa arnalǵan tehnıkamen tolyq qamtamasyz etilgen. Bas maman eger qalada qar shamadan tys jaýatyn bolsa, qurylys kompanıalardyń kómegine júginemiz deıdi. Aıtýynsha, qurylys kompanıalarynyń kólikteri qys kezinde kóbinese bos turady. Sol sebepti olar bizge 150-ge jýyq samosval, 100-ge jýyq jumysshylarymen kómektesýge daıyn. Arnaıy kelisimshartqa otyrǵan.
Sala mamandarynyń aıtýynsha, Almatyda qar tazalaý jumystarymen 10 merdiger kompanıa aınalysady. 969 arnaıy tehnıka men 1400 jol jumysshysy bar. Ádette olar kúndiz jáne túngi ýaqytta eki aýysym boıynsha jumys isteıdi. Biraq, qazirgi jaǵdaıǵa baılanysty táýlik boıy júrgiziletin jumys kestesine aýystyrylǵan.
– Erteń, búrsigúni qalada qalyń qar jaýady dep kútilýde. Sondyqtan tazalyqshylar úshin úzdiksiz jumys kútip tur. Jol jumysshylary úshin barlyq jaǵdaı jasalǵan. Óndiristik baza aýmaǵynda arnaıy tynyǵatyn bólme bar. Onda jumysshylarǵa arnap aspazdar ystyq taǵamdar ázirleıdi, - deıdi S.Vıktorov.
Aıta keteıik, aýdan ákimdikterimen basqarma mamandary birigip, qalanyń negizgi magıstraldyq kóshelerindegi qarlar 3 jumys kúni ishinde tolyǵymen qala syrtyna shyǵarylady. Jalpy, kóktaıǵaqtyń aldyn alý maqsatynda komýnaldyq qyzmetter joldardy qardan tazartýǵa 969 tehnıka (onyń ishinde qumshashqysh, samsosval) men 1400 jol jumysshysy jumyldyrylady.
Aıta keteıik, Almatyda sońǵy ret qalyń qar 2016 jyly jaýypty.