Sońǵy jyldary onkologıalyq aýrýdy erte anyqtaý kórsetkishi artyp keledi, dep habarlady Almaty onkologıalyq ortalyǵynyń dırektory Nursultan Izbagambetov.
2023 jyldyń 9 aıynda bul kórsetkish 38,7%-ǵa ósti. Ótken jyldyń sáıkes kezeńimen salystyrǵanda ósý qarqyny 6,7 paıyzdy qurady.
Sonymen qatar keıingi (III-IV) kezeńde kórinetin lokalızasıada qaterli isikti anyqtaý kórsetkishi tómendeı tústi.
2023 jyldyń 9 aıynda bul kórsetkish 6,6%-dy (2022 jyldyń 9 aıynda - 6,3%) qurady.
Buǵan maqsatty topty skrınıngtik tekserýmen qamtýdyń arqasynda qol jetkizildi, ári bul onkologıalyq aýrýdy erte kezeńde anyqtaýǵa múmkindik beredi. 2023 jyldyń 9 aıynda Almatyda qaterli isikti erte anyqtaý boıynsha skrınıngtik tekserý jalpy skrınıngtik jospardyń 88,8%-yn qamtydy.
Skrınıngtik tekserýdiń arqasynda 207 qaterli isik aýrýy, onyń 194-i (93,7%) erte satysynda anyqtaldy.
Sondaı-aq 922 naýqasta qaterli isiktiń damý qaýpin týdyratyn isik aldy aýrýy anyqtaldy. Barlyq naýqas ýaqtyly mamandandyrylǵan emmen qamtamasyz etildi.
Qaterli isik aýrýyn erte kezeńde anyqtaý tıimdi, tipti tolyq emdeýge múmkindik beretinin este ustaıyq.
Qorytyndylaı kele, Nursultan Izbagambetov skrınıngtik tekserýden kim jáne qashan ótetinin taǵy da eske saldy: 40-70 jastaǵy áıelder sút bezi obyryna 2 jylda bir ret mammografıalyq skrınıng; 30-70 jastaǵy áıelder 4 jylda bir ret isik aldy jáne jatyr moıny obyrynyń sıtologıalyq skrınıngi; 50-70 jas aralyǵyndaǵy erler men áıelder 2 jylda bir ret jasyryn qanǵa test kómegimen kolonoskopıa arqyly toq ishek pen tik ishektiń qaterli isigi men isik aldy aýrýlaryna skrınıng.