25 qazan – Respýblıka kúni Uly Otan soǵysynyń ardageri Qambar Sársenov 101 jasqa toldy, - dep habarlaıdy Aqshamnews.kz Qorǵanys mınıstrligine silteme jasap.
Qarıany qos merekemen Desanttyq-shabýyldaý áskerleriniń qolbasshylyǵy, Medeý aýdandyq qorǵanys isteri jónindegi basqarmasynyń áskerı qyzmetshileri jáne «Qarýly kúshterdiń ardagerleri» respýblıkalyq qoǵamdyq birlestigi Almaty qalalyq fılıaly tóraǵasynyń orynbasary otstavkadaǵy polkovnık Tólegen Mustafın quttyqtap bardy.
Qambar Sársenovke Qorǵanys mınıstriniń atynan Otan aldyndaǵy eńbegi úshin alǵys bildirgen quttyqtaý haty tabystaldy.
Ardager kelgen qonaqtarǵa yqylas tanytyp, barsha qazaqstandyqtardy Respýblıka kúnimen quttyqtady. Maıdan dalasynda aýyr synaqtardy bastan ótkergen qart jaýynger elge amandyq, otbasylarǵa baq-bereke, Qazaqstanǵa gúldený men ashyq aspan tiledi.
Qambar Sársenov 1924 jylǵy 25 qazanda Qostanaı oblysynda dúnıege kelgen. 1942 jyly ásker qataryna shaqyrylyp, oqý-jattyǵýdan keıin maıdanǵa attanǵan. Ol Belarýs, Latvıa jáne Lıtva jerlerinde shaıqasyp, Kenıgsbergti alý operasıasyna qatysqan, úsh ret jaralanǵan.
Qambar Sársenov I, II dárejeli Otan soǵysy, II, III dárejeli Dańq jáne «Qyzyl Juldyz» ordenderimen, sondaı-aq kóptegen medaldarmen marapattalǵan. Ardager Vıtebsk Qyzyl Tý ordendi, Sývorov ordendi 51-atqyshtar dıvızıasynyń 30-jeke barlaý rotasynda qyzmet etip, «qarsylasty» ustap alǵany úshin eki ordenmen nagradtalǵan.
Soǵystan keıin Qambar Sársenov ishki ister organdarynda qyzmet atqaryp, keıin Almatynyń energetıka salasynda uzaq jyl eńbek etken.