Almatyda Halyqaralyq qarttar kúnin merekeleý aıasynda Qarttar aılyǵy ótedi
3 qazan kúni saǵat 15:00-de Abylaı han kóshesi, 83 (Qazaqkonsert ǵımaraty) mekenjaıy boıynsha zeınetkerlerge arnalǵan «Belsendi qarıalar – qoǵam qazynasy!» merekelik konserti ótedi. Baǵdarlamada hor jáne bı ujymdarynyń, dombyra orkestriniń, sporttyq kórsetilimderdiń, jeke nómirlerdiń qoıylymdary bar. Sonymen qatar, shyǵarmashylyq jumystar men qolóner kórmesi uıymdastyrylady, dep habarlaıdy almaty-akshamy.kz.
2023 jyly 6 qazanda saǵat 13:00-de Almaty qalasynyń jumyspen qamtý jáne áleýmettik baǵdarlamalar basqarmasy 28 gvardıashyl-panfılovshylar saıabaǵynyń janynda, Gogol kóshesi, 40 mekenjaıynda ornalasqan «Juldyz» meıramhanasynda ardagerlermen kezdesý uıymdastyrady. Onda konsert qoıylyp, syılyqtar tabystalady.
Buǵan qosa, «Almaty qalasynyń belsendi uzaq ómir súrý ortalyǵy» KMM qazan aıy boıy:
2-31 qazan – «Sheberler» sándik-qoldanbaly shyǵarmashylyq kórmesin (OAA foıesi);
11 qazan – «Agrokraýdsorsıng» jobasy boıynsha «Egin merekesi» (Almaty oblysy, Avat kenti);
apta saıyn – ekskýrsıalar, mýzeıler aralaý uıymdastyrady;
24 qazan - skandınavıalyq júris festıvali.
Árbir is-sharada eń belsendi, talantty zeınetkerler, shyǵarmashylyq ujymdar men sporttyq komandalar anyqtalady. Olarǵa arnaıy gramotalar men baǵaly syılyqtar tabys etiletin bolady.
Sonymen qatar, Halyqaralyq qarttar kúnin toılaý aıasynda Almatyda qarıalarmen kezdesýler uıymdastyrylady. Uly Otan soǵysynyń ardagerlerin, eńbek maıdangerlerin úılerine baryp quttyqtaıdy. Ári olar úshin «Alataý» dástúrli óner teatrynda mádenı-oıyn-saýyq is-sharalary uıymdastyrylady. Soǵys ardagerleri men eńbek maıdangerlerine áleýmettik-turmystyq máseleler boıynsha kómek kórsetiledi. Jalǵyzbasty qarttarǵa kómek retinde qaıyrymdylyq aksıalary ótkiziledi.
Medısınalyq-áleýmettik mekemelerde qarttarǵa arnap qazaqstandyq estrada juldyzdary án salyp, sırk ártisteri óner kórsetedi, merekelik túski as uıymdastyrylady. Sonymen birge qalanyń medısınalyq mekemelerinde tar beıindegi medısına qyzmetkerlerin tarta otyryp, qart azamattar úshin «Ashyq esik kúnderi» ótedi. Soǵys jáne eńbek ardagerlerine stomatologıalyq kómek kórsetiledi. Ol úshin azamattardyń osy sanattaryna turǵylyqty jeri boıynsha aýdandyq emhanalar júginý qajet. Al mobıldi emes zeınetkerler úshin keshendi brıgadalar úıde medısınalyq tekserý júrgizedi.
Orta arnaýly jáne joǵary oqý oryndarynda soǵys jáne eńbek ardagerleriniń qatysýymen kezdesýler, konferensıalar, dóńgelek ústelder, ashyq sabaqtar, teatrlandyrylǵan qoıylymdar, aksıalar jáne basqa da is-sharalar ótkiziledi. Qala mektepterinde qarttar kúnine arnalǵan «Meıirimdilik pen qaıyrymdylyq sabaǵy» tárbıelik is-sharasy ótedi.
Esterińizge sala keteıik, Almatyda 01.10.2023 jaǵdaı boıynsha 239 703 zeınetker bar, 51UOS-nyń ardageri, 7 590 eńbek maıdangeri, sonymen qatar, ózge memleketterdiń aýmaǵynda 2 985 jaýyngerlik is-qımyl jasaǵan ardageri turady.