Almatyda búgin tańǵy 8:00-den bastap qar jaýa bastady. "Qazgıdromet" málimetinshe, qar keshki 21:00-ge deıin jalǵasady, al onyń qalyńdyǵy 9 mm-ge deıin jetýi múmkin. Aýa temperatýrasy kúndiz shamamen 0°C, túnde -9...-11°C aralyǵynda bolady, dep habarlaıdy aqshamnews.kz
Qala kóshelerin qardan tazalaýǵa 603 arnaıy tehnıka men 1 034 jumysshy jumyldyryldy. Joldardy muzǵa qarsy materıaldarmen óńdeý úshin 130 qumshashqysh tehnıka, onyń ishinde «Epoka» jáne «Djetbrým» sıaqty quraldar paıdalanylýda. Ásirese, taýly aımaqtar men Ál-Farabı dańǵylynan ońtústikke qaraı ornalasqan aýdandarǵa erekshe nazar aýdarylyp, 28 arnaıy tehnıka jumys istep jatyr. Sonymen qatar, 70 shaǵyn tehnıka trotýarlar, qoǵamdyq kólik aıaldamalary jáne avtoturaqtardy qardan tazalaýǵa jumyldyryldy.
15-16 jeltoqsanda jaýǵan qardy tazalaý barysynda túngi ýaqytta magıstraldy kóshelerden qardy jappaı shyǵarý aıaqtaldy. Sońǵy tórt kún ishinde qala aýmaǵynan 45 500 m³ qar shyǵaryldy, josparlanǵan jumys tolyq oryndaldy.
Qala turǵyndaryna qaýipsizdik sharalaryn saqtap, joldarda abaı bolý eskertildi. Sonymen qatar, qar tazalaý jumystaryna qosymsha júkteme túsirmeý úshin "Medeý" muz aıdyny men "Shymbulaq" taý-shańǵy kýrortyna barýdy ýaqytsha shegere turý usynylady.
Komýnaldyq qyzmetter qala joldaryn qaýipsiz etý maqsatynda kúsheıtilgen rejımde jumysyn jalǵastyrýda. 21 jeltoqsanda jaýyn-shashynsyz aýa raıy kútilip, temperatýra kúndiz -5...-7°C shamasynda bolady.