Bul týraly osy baǵytty qadaǵalaıtyn qala ákiminiń orynbasary Beıbit Shahanov aıtyp berdi.
7 qańtardan 8 qańtarǵa qaraǵan túni jaýa bastaǵan qalyń qar túske deıin jalǵasty. Qardyń qalyńdyǵy saǵat 12:00-de 15 santımetrge, al taýly aımaqtarda 20-30 santımetrge jetti, dep habarlaıdy aqshamnews.kz.
Almaty ákiminiń orynbasary Beıbit Shahanovtyń aıtýynsha, komýnaldyq qyzmet kóshelerdi, joldardy jáne trotýarlardy kúreýge jedel kirisip, qar shyǵarý jumystaryn táýlik boıy júrgizýde:
- 8 qańtar saǵat 00:00-den 11:00-ge deıin qalada shamamen 15 santımetr qar jaýdy. Saǵat 1:00-de joldardy kóktaıǵaqqa qarsy qospalar sebý bastaldy. 4:30-dan bastap qardy jol jıegine ysyrý jumystary júrgizildi. Odan keıin qar úıindilerin qalyptastyrý, qardy jkú kólikterine tıeý jáne ony arnaıy polıgondarǵa shyǵarý jumystary júrgiziledi.
Bul jumys aldymen ortalyq jáne magıstraldi kóshelerde júrgiziledi, sebebi turǵyndardyń negizgi bóligi osy joldarmen júredi. Odan keıin aýdandyq deńgeıdegi joldarǵa kóshemiz, bul jumysty múmkindiginshe tezirek aıaqtaýǵa tyrysamyz.
Jalpy qabyldanǵan normaǵa sáıkes magıstraldi kósheler 3 kúnge deıin, aýdandyq mańyzy bar kósheler 7 kúnge deıin tazalanady. Biraq ádette bul jumysty erterek aıaqtaýǵa tyrysamyz.
Kúndizgi ýaqytta 500-ge jýyq arnaıy qar tazalaý tehnıkasy jáne 1100-den astam jumysshy jumyldyrylǵan. Túngi ýaqytta da shamamen osyndaı kólemde tehnıka men jumysshylar jumysqa shyǵady. Negizinen biz qardy kólik az kezde túnde tazalaýǵa tyrysamyz.
Qalada joldardy qardan tazalaıtyn tehnıka belsendi túrde jańartylýda. Sońǵy 2 jylda shamamen 140 jańa zamanaýı tehnıka satyp aldyq. Bul jumys bıyl da jalǵasyn tabady. Biz jyldamdyqty arttyratyn jáne qol eńbegin tıimdi almastyratyn jańa tehnıkalardy satyp alamyz. Osy arqyly qar shyǵarý jumysynyń sapasyn jaqsartamyz.
Byltyr qalada kóriktendirý erejeleri qabyldandy. Soǵan sáıkes, kóriktendirý tólqujattary engizildi. Endi saýda nysandary men mekemeler ózderiniń aýmaǵyn taza ustaýǵa, sonyń ishinde qardy kúreýge mindetti. Sondyqtan saýda nysandaryn qala tazalyǵyna belsendi qatysýǵa shaqyramyz.
Qardy tazalaýǵa belgili bir ýaqyt qajet ekenin eskere otyryp, turǵyndardan ýaqytsha qolaısyzdyqqa túsinistikpen qaraýdy suraımyz. Sonymen qatar, qar tazalanǵansha kólikti jol jıegine qoımaýǵa shaqyramyz.