5 qańtarda Ulttyq ulannyń «Ońtústik» óńirlik qolbasshylyǵynda qańtar oqıǵasy kezinde erlikpen qaza tapqan sarbazdar Aıbat Amanov pen Madıar Qaısarovty eske alýǵa arnalǵan «Máńgili sapta» bir kúndik aksıasy ótkizildi. İs-shara bir mınýttyq únsizdikpen bastaldy.
İs-sharany ashqan «Ońtústik» óńirlik qolbasshylyǵy qolbasshysynyń birinshi orynbasary – shtab bastyǵy, polkovnık Bekaıdar Qaskeev el ishin eseńgiretip tastaǵan qaıǵyly qańtar oqıǵasyna toqtalyp, qaza bolǵan "ulandyq" batyrlardyń kózsiz erlikterin úlgi etýdiń mańyzdylyǵyn atap ótti.
Óz kezeginde sóz alǵan TjÁQJ basqarmasynyń bastyǵy, polkovnık Atabek Salıhbaev qoǵamdyq tártipti qamtamasyz etý boıynsha áskerı boryshyn óteý kezinde qaza bolǵan "ulandyq" jaýyngerler Madıar men Aıbattyń erlikteri týraly baıandama jasady.
İs-shara sońynda áskerı qyzmetshilerge eki jaýynger týraly derekti fılm kórsetildi. Fılmde "ulandyq" batyrlardyń ata-analary, ustazdary, dostary jáne komandırleri olardyń ómirleri týraly aıtqan estelikteri beınelengen. Fılmdi qaraǵan áskerı qyzmetshiler eriksiz kózderine jas aldy.
Aıta keteıik, qańtardaǵy qaqtyǵysta «Ońtústik» óńirlik qolbasshylyǵynyń áskerı qyzmetshileri orny tolmas shyǵynǵa ushyrady. Qatardaǵy jaýyngerler Qaısarov Madıar Orazalyuly, Amanov Aıbat Erboluly erlikpen qaza tapty, olardyń esimi áskerı bólimderdiń tizimine máńgilikke engizildi. Atalǵan jaýyngerler, Qazaqstan Respýblıkasy Prezıdentiniń Jarlyǵymen (qaıtys bolǵannan keıin) İİİ dárejeli «Aıbyn» ordenimen nagrattaldy.
Konstıtýsıalyq boryshtaryn qamtamasyz etý kezinde erlikpen qaza bolǵan Ulttyq ulannyń sarbazdary máńgilik jadymyzda!