Úsh almatylyq arnaıy úıshikti panalaǵan.
Sońǵy eki aptada Almatyda jańadan úsh qosymsha taý úıshigi ornatyldy. Endi olardyń sany 18. Sońǵy málimetter boıynsha, tek sońǵy 2 aıda ǵana osy úıshikterdi týrıserdiń 10-nan astam toby baspana retinde panalaǵan, dep habarlaıdy Almaty-akshamy.kz.
Týrısik toptan ajyrap qalǵan úsh almatylyq 25 jeltoqsanda «Kishi Almaty aınalymy» baǵyty boıynsha adasyp qalady. Taý joryǵynda Medeý — Kımasarov shatqaly — Fýrmanovka — Panorama— Bashýta — Shymbulaq — Talǵar úlken asýy— Shymbulaq — Medeý baǵyttary qarastyrylǵan.
Óz kúshterin eskermegen ári arnaıy jabdyqtarsyz jáne azyq-túlik qorynsyz olar Kishi Almaty shatqalyndaǵy arnaıy taýly úıshikti panalaıdy.
«Olar túski asqa deıin toppen birge shyǵyp, bes saǵat aralyǵynda toptan múldem ajyrap, adasyp ketedi. Baqytymyzǵa oraı, olar kún batqanǵa deıin arnaıy úıshikti panalaǵan. Úsheýinde shamdary, jyly kıimderi bolǵan joq. Eger taýly úıshikti panalamaǵanda, olar túnde qatty adasyp, úsip qalýlary múmkin edi», - dedi taý qutqarýshysy Nurbol Nuralın.
Qutqarýshylar úıshikten saǵat 21:00-de habar alady, sodan keıin quramynda Nurbol Nuralın bar qutqarýshylar toby adasqan týrıserge jiberiledi. Túngi saǵat 2-de olar Kishi Almaty shatqalyna jetip, týrıserdiń jaǵdaıyn tekserip, olarǵa ystyq tamaq beredi. Tańerteń adasqan top qalaǵa jetti.
Taý úıshikterin ornatý jobasynyń basynan beri 20-dan astam top týrısik baspanany paıdalandy. Búginde Almaty taýlarynda asa mańyzdy baǵyttardyń qıylysý núktelerinde 18 taý úıshigi bar.
«Týrısik úıshikte qonyp shyqqan soń, olardyń óte paıdaly ekenine kóz jetkizdim. Úıshik men úshin qutqarýshy boldy, óıtkeni men tizemniń aýyrsynýyn sezinip, keri qaraı júre almadym. Arnaıy úıshikte túnep shyqqan soń, @visitalmatykz-ke alǵys aıtqym keledi, óıtkeni bul úıde taý týrıseri úshin barlyq qajetti jaǵdaılar jasalǵan: TJM-ge qońyraý shalý túımesi; elektr jaryǵy jáne uıaly telefondy zarádtaý qurylǵysy; daıyndalǵan otyny bar pesh; shkafta krýjka men kompanıanyń logotıpteri bar úsh kórpe boldy.Alǵashqy medısınalyq kómek qobdıshasy men úsh kereýet bar, úıshik alystan birden kórinedi, qyzǵylt sary túske ıe», - dep jazdy qutqarylǵan týrıs Saltanat áleýmettik jelidegi paraqshasynda.
Búginde İle Alataý taýlarynda aýa raıynyń qolaısyzdyǵy nemese kúrdeli joryqtar kezinde týrıser panalaıtyn jańadan 3 qosymsha taý úıshikteri ornatyldy. Olar Úlken Almaty shatqalyndaǵy «Terra» alańynda, sondaı-aq Kishi Almaty shatqalyndaǵy Býkreev pen Qumbel shyńdarynda ornalasqan.
Úıshikter qutqarýshylarmen shuǵyl baılanys júıesimen jabdyqtalǵan, olarda alǵashqy kómek apattyq jıyntyǵy - alǵashqy medısınalyq kómek qobdıshasy, mobıldi qurylǵylardy zarádtaý stansıasy, jyly kórpe jáne buzylmaıtyn azyq-túlik jıyntyǵy ( sirińke, tez daıyndalatyn kespe, kreker, bankadaǵy botqa, otyn) bar. Arnaıy úıshikter alystan kózge birden shalynatyn ashyq qyzǵylt sary túske boıalǵan.
