Almaty qalasy Bostandyq aýdanynyń №2 aýdandyq sotynda azaptaý faktisi boıynsha polısıa qyzmetkerlerine qatysty qylmystyq is qaraldy.
Sot ótken jyldyń qańtar aıyndaǵy jappaı tártipsizdikter kezinde avtokólikti zańsyz ıemdendi degen kúdikke ilingen azamat R.-nyń polısıa bólimshesine jetkizilgenin anyqtady, dep habarlaıdy Almaty-akshamy.kz QazAqparatqa silteme jasap.
Polısıa qyzmetkeri Q. odan ári tergep-tekserý úshin azamat R.-ny polısıa qyzmetkerleri B. jáne H-ǵa tapsyrǵan. Ol ekeýi azamat R-ny tártipsizdikterge qatysty dep eseptep, zardap shekken áriptesteri úshin kek alamyz degen maqsatpen oǵan fızıkalyq qysym kórsetip, kúsh qoldanyp, azaptaǵan.
Sotta habarlaǵandaı, atalmysh áreketter úshin qylmystyq kodekste belgili bir laýazymdardy atqarý quqyǵynan aıyra otyryp, 3 jyldan 7 jylǵa deıingi merzimge bas bostandyǵynan aıyrý túrindegi jaza qarastyrylǵan.
Sondaı-aq úsh polısıa qyzmetkeri qylmystyq quqyqbuzýshylyq jasaǵanyn basshylyqtan jasyrǵan.
Qylmystyq kodekste quqyq qorǵaý organynyń qyzmetkeri bola otyryp, qyzmette áreketsizdik jasaǵany úshin úsh jylǵa deıin bas bostandyǵynan aıyrý jazasy kózdelgen.
Sot sottalýshy Q.-ǵa jaza taǵaıyndaý kezinde múliktik zalaldy jáne moraldyq zıandy erikti túrde óteýin jazany jeńildetetin mán-jaılar dep tanydy. Al tótenshe jaǵdaıda qylmystyq quqyqbuzýshylyq jasaýyn jáne onyń bergen antyn buzýyn jazany aýyrlatatyn mán-jaılar retinde tanydy.
Sottalýshy B.-ǵa jaza taǵaıyndaý kezinde jas balalarynyń bolýyn, múliktik zalal men moraldyq zıandy óteýin jazany jeńildetetin mán-jaılar retinde qarastyrsa, tótenshe jaǵdaıda qylmystyq quqyqbuzýshylyq jasaǵany jáne onyń bergen antyn buzǵan áreketterin jazany aýyrlatatyn mán-jaılar retinde eskerdi.
Sottalýshy H.-ǵa jaza taǵaıyndaý kezinde tótenshe jaǵdaıda qylmystyq quqyqbuzýshylyq jasaǵany jáne antyn buzǵan áreketterin jazany aýyrlatatyn mán-jaılar retinde tanydy.
«Sot úkimimen sottalýshylar B. jáne H. Qylmystyq kodekstiń 1-tarmaǵynyń 146-baby 2-bóligi boıynsha kináli dep tanylyp, úsh jyl merzimge memlekettik qyzmette qyzmet atqarý quqyǵy shektele otyryp, úsh jyl merzimge bas bostandyǵynan aıyrý jazasy taǵaıyndaldy. Sottalýshy Q. QK-niń 370-babynyń 2-1-bóligi boıynsha kináli dep tanylyp, memlekettik qyzmette qyzmet atqarý quqyǵynan ómir boıyna aıyryldy. Sondaı-aq, oǵan 1 jyl 6 aı merzimge bas bostandyǵyn shekteý túrindegi jaza taǵaıyndaldy. Úkim zańdy kúshine engen joq», - dep habarlady Almaty qalalyq sotynyń baspasóz qyzmetinde.