Almatyda qalalyq ǵylymı-praktıkalyq konferensıa bolyp ótti

Almatyda «BMSK boıynsha pedıatrıalyq kómek berýdiń ózekti máseleleri» atty halyqaralyq uıymdar men mamandar qatysqan qalalyq ǵylymı-praktıkalyq konferensıa bolyp ótti, dep habarlaıdy almaty-akshamy.kz.   
 
Jetisý aýdanyndaǵy №11 qalalyq emhana bazasynda «BMSK boıynsha pedıatrıalyq kómek berýdiń ózekti máseleleri» taqyrybyndaǵy halyqaralyq uıymdar men mamandar qatysqan qalalyq ǵylymı-praktıkalyq konferensıa boldy. Halyqaralyq balalardy qorǵaý kúnine qaraı oraılastyrylǵan is-sharany №11 qalalyq emhana, «S.D. Asfendıarov atyndaǵy QazUMÝ» UAQ ambýlatorıa-klınıkalyq kómek kafedrasy jáne Samarqand medısına ýnıversıtetiniń (Samarqand, Ózbekstan) 1 pedıatrıa jáne neonatologıa kafedrasy uıymdastyrdy.   
 
Konferensıaǵa Jetisý aýdanynyń dáriger-pedıatrlary, jalpy tájirıbe  dárigerleri (№11 QE, №21 QE, «Qulager» BSMK), rezıdentter jáne joǵaryda aıtylyp ótken kafedralardyń profesor-oqytýshy quramy qatysty. Qatysýshylar BMSK saı balalarǵa beriletin pýlmonologıalyq, kardıologıalyq jáne endokrınologıalyq kómektiń mańyzdy degen tustaryn talqylady.  
 
Dırektordyń balalar jáne akýsherlik is jónindegi orynbasary Almash Ardabaeva is-sharanyń moderatory boldy. Ol kisi praktıkalyq densaýlyq saqtaý isine bilim berý úderisiniń kirigýiniń mańyzdylyǵyna mán berip, №11 qalalyq emhananyń «S.D. Asfendıarov atyndaǵy QazUMÝ» UAQ klınıkalyq kafedralarymen talaı jyldan bergi yntymaqtastyǵy jalǵasyp kele jatqanyn atap ótti. Bul yntymaqtastyq joǵary oqý oryndarynyń profesor-oqytýshy quramynyń jınaǵan mol  klınıkalyq tájirıbesin  praktıkalyq densaýlyq saqtaý júıesine engizýge múmkindik beredi.  
 
Ambýlatorıa-polıklınıkalyq pedıatrıa kafedrasynyń meńgerýshisi, m.ǵ.d. Roza Seısebaeva alǵysyn aıtyp, emhanamen jáne basqa da praktıkalyq densaýlyq saqtaý uıymdarymen keńesı jáne bilimı turǵyda kómek berýde ary qaraıǵy tyǵyz yntymaqtastyqqa daıyn  ekenin bildirdi.   
 
Konferensıa barysynda ár alýan aýrýlary, onyń ishinde bronhókpe dısplazıasy, boı óspeýshilik, tynys alý jollarynyń sozylmaly aýrýlary (JAB), jedel respıratorly vırýsty ınfeksıa (JRVI), pnevmonıa jáne mıokardıt aýrýlary bar balalardy dıagnostıkalaý, emdeý jáne dıspanserızasıalaý máseleleri de shet qalmady. Gıpofostazıa sıaqty zat almasýdaǵy buzylystardy jáne boı óspeýshilikti erterek dıagnostıkalaý máselesine aıryqsha nazar aýdaryldy.  
 
Bronhókpe dısplazıasyna shaldyqqan shala týǵan balalardy ońaltý problemalaryna, olardy emdeý taktıkasyna, ambýlatorıa jaǵdaıynda ońaltý jáne dıspanserlik baqylaýǵa kóp kóńil bólindi. Katamnestıka kabıneti men ımýndyq dáriler arqyly arnaıy aldyn alý sharalary talqyǵa tústi.  
 
Samarqand memlekettik medısına ýnıversıtetinen kelgen qonaqtar jıi jáne ara-tura aýyryp turatyn balalar, sondaı-aq pnevmonıaǵa shaldyqqan, mıokardıtteri asqanǵan balalar úshin em-dıagnostıka  problemalaryn talqyǵa saldy.  SamMMÝ ambýlatorıa-polıklınıkalyq pedıatrıa kafedrasy men 1 pedıatrıa jáne neonatologıa kafedrasynyń qyzmetkerleri respıratorlyq trakt, endokrın jáne júrek-qan tamyr patologıasy bar balalardy qabyldap, keńes berdi.   
 
Alýan túrli baǵyttar boıynsha baıandamalar jasalyp, ártúrli sharalarǵa toly bolǵan konferensıa  BMSK jaǵdaıynda balalar aýrýlaryn dıagnostıkalaý men emdeýdegi biryńǵaı mýltısalalyq ádis-tásilder júıesin túzýge septigin tıgizdi. Bul is-shara oǵan qatysýshylardyń  bilimin molaıtyp qana qoımaı, pedıatrıalyq kómek salasyndaǵy halyqaralyq yntymaqtastyqty da nyǵaıta tústi - bunyń balalarǵa arnalǵan medısınalyq qyzmet túrleriniń sapasyn arttyrýǵa ońdy áser eteri sózsiz.