Almatylyqtar «Taza Qazaqstan» baǵdarlamasyna belsendi qatysýdy jalǵastyrýda.
Munyń taǵy bir dáleli-tanymal qazaqstandyq oryndaýshy Sadraddınniń jeke konsertinen keıin qala turǵyndarynyń Ortalyq stadıon aýmaǵyn tazalaýǵa jappaı qatysýy boldy, dep habarlaıdy aqshamnews.kz.
İs-shara sońynda oryndaýshynyń ózi kórermenderdi konsertten keıin tazalyqty saqtaýǵa shaqyrdy.
«Qala kúnimen quttyqtaımyn! Súıikti qalamyzdy qorǵap, onyń tazalyǵyn saqtaıyq», - dedi ol barlyq qatysýshylarǵa.
Ortalyq stadıonnyń aýmaǵyn tazalaýǵa Almaty jastary da qatysty. Munda 300-ge jýyq eriktiler qatysty. Jastar qoqysty jınap, konteınerlerge tastady.
«Qalaǵa degen súıispenshilik tabıǵatqa degen súıispenshilikten bastalady. Osylaısha biz ortaq úıimizdiń ádemi kórinisin barynsha saqtaı alamyz! Biz kóppiz, al qala jalǵyz. Árkim óziniń ortaq úıine qamqorlyq jasaǵanda, qalanyń sulýlyǵy men jaılylyǵy saqtalady. Tabıǵat pen qalanyń úılesimdiligi árqaısymyzdyń qolymyzda. Kishkentaı qadamdar men jaýapkershilikpen biz qala ómiriniń sapasyn jaqsarta alamyz, sonymen qatar tabıǵatqa degen súıispenshiligimizdi kórsete alamyz. Bizdiń árqaısymyzdyń is — áreketimiz qalamyzdyń bolashaǵyna úlken áser etedi», - dedi óz sózinde almatylyq erikti Eldar Baıǵabylov.
Bul bastama qalany taza ustap qana qoımaı, jas urpaqtyń áleýmettik jaýapkershiligin arttyrady. Almatynyń turǵyndary men qonaqtary mundaı bastamany joǵary baǵalap, olarǵa qoldaý bildirdi.
Esterińizge sala keteıik, bul mundaı alǵashqy aksıa emes. 14 qyrkúıekte Astana alańyndaǵy konserttik baǵdarlama aıaqtalǵannan keıin megapolıstiń turǵyndary men qonaqtary uıymdastyrýshylardyń shaqyrýyna belsendi jaýap berip, qoqysty tazartýǵa kómektesken edi.