Almatyda kemirgishterdiń sany men taralýyn azaıtýǵa baǵyttalǵan keshendi sanıtarlyq jumys qolǵa alyndy. Bul qalanyń segiz aýdanynyń barlyq aýmaǵyn qamtyp, turǵyndardyń densaýlyǵy men turmys jaılylyǵy úshin sanıtarlyq qaýipsizdik deńgeıin arttyrýǵa baǵyttalǵan. Bul týraly Qoǵamdyq ınfraqurylym jáne turǵyn úı ınspeksıasy basqarmasy habarlady.
"EKO Servıs Almaty" jáne "Ala Comfort" kompanıalarynyń málimetinshe, búginge deıin 47 myń gektardan astam aýmaq dárilendi, 138 myńnan asa turǵyn úı nysany turaqty baqylaýda tur. Jumysqa kún saıyn tórt mamannan turatyn 10 mobıldi top qatysady.
Deratızasıa josparǵa sáıkes, sanıtarlyq talapty saqtaı otyryp, jyl boıy júıeli túrde júrgiziledi. Qoldanylatyn barlyq preparat sanıtarıalyq-epıdemıologıalyq saraptamadan ótken, adam, úı janýarlary men qorshaǵan orta úshin qaýipsiz.
Dárileý jumysy jertólelerde, konteıner alańdarynda, ınjenerlik qudyqtarda jáne kemirgishter jıi shoǵyrlanatyn tabıǵı aýmaqtarda júrgizilip jatyr. Preparattardyń áser etý merzimi – jeti kún. Osydan keıin mamandar tekseris júrgizip, qajet bolǵan jaǵdaıda jem shashady.
Jeke sektor turǵyndary úshin aýla aýmaqtaryn ózdiginen dárileýge arnalǵan tıimdi quraldar tegin beriledi.
Mamandardyń aıtýynsha, kemirgishterdiń kúz maýsymynda belsendi bola túsedi. Sondyqtan turǵyndarǵa: qoqysty konteınerden tys qaldyrmaý, jertólelerdi taza ustaý, kemirgishterdiń kóbeıýine jol bermeý syndy sanıtarlyq tártipti saqtaýdyń mańyzy eske salynady.
"EKO Servıs Almaty" kompanıasy ókilderi atap ótkendeı, deratızasıa – bir rettik naýqan emes, úzdiksiz atqarylatyn sanıtarlyq jumys. Bul úderis komýnaldyq qyzmetterdiń ǵana emes, qala turǵyndarynyń da birlesken jaýapkershiligin talap etedi. Negizgi maqsat – Almatyny taza, qaýipsiz ári jaıly etý.