Almatydaǵy Bas Botanıkalyq baq búginde tek erekshe qorǵalatyn tabıǵı aımaq qana emes, ǵylym, tabıǵat, óner men qoǵamdy biriktirgen mańyzdy ortalyqqa aınaldy. Munda ondaǵan ekologıalyq, ǵylymı, mádenı jáne bilim berý jobalary júzege asyp jatyr. Bul týraly Almaty qalasy Óńirlik komýnıkasıalar qyzmetinde ótken baspasóz konfensıasynda habarlandy.
Keıingi jyldary baqtyń tanymaldylyǵy artyp keledi. Botanıkalyq baqtyń marketıń jáne qoǵammen baılanys bóliminiń jetekshisi Baıan Kospenbetovanyń aıtýynsha, Botanıkalyq baq – oıyn-saýyq alańy emes, sonymen qatar, ǵylymı jáne tabıǵatty qorǵaý orny.
"Bizdiń is-sharalarǵa degen qyzyǵýshylyq jyldan jylǵa artyp keledi. Eger 2021 jyly baqqa shamamen 300 myń adam kelse, byltyr bul kórsetkish 600 myńǵa jetken edi. Endi bizge jaı serýendep qana qoımaı, tabıǵatqa qurmetpen qaraıtyn, ósimdikterdi erekshe baǵalaıtyn adamdar kelse deımiz", – deıdi ol.
Baq aýmaǵynda ekologıalyq jáne bilim berý baǵdarlamalary turaqty túrde ótedi. Olardyń qatarynda: "Bilý - súıý úshin" baǵdarlamasy, ekskýrsıalar, balalar men otbasylarǵa arnalǵan sheberlik sabaqtary bar. Sonymen qatar Tabiğat Labs jobasy, túrli ashyq dárister, "Jasyl reındjerler klýby" men BookKúltýra mádenı klýbynyń kezdesýleri uıymdastyrylady. Mádenı is-sharalardyń ishinde InEco Fest festıvali, Sıvers almasynyń gúldeý merekesi, sondaı-aq Jambyl atyndaǵy fılarmonıa ártisteriniń qatysýymen ótetin ashyq aspan astyndaǵy konsertter erekshe oryn alady. Áleýmettik baǵyttaǵy jobalar da jalǵasýda - mektep-ınternat oqýshylary men "MamaPro" jobasynyń qatysýshylaryna ekskýrsıalar men tegin sheberlik sabaqtary ótkiziledi. Qazan aıynyń sońyna deıin zeınetkerler jumys kúnderi baqqa tegin kire alady.
Baq Ekologıa jáne tabıǵı resýrstar mınıstrligine qarasty Botanıka jáne fıtoıntrodýksıa ınstıtýtynyń basqarýynda. Instıtýtta 11 ǵylymı zerthana jumys isteıdi jáne onyń qaramaǵynda Qazaqstandaǵy tórt botanıkalyq baq bar. Olar: Almatydaǵy Bas baq, İle, Jezqazǵan jáne Astana baqtary.
Instıtýt ǵalymdary ósimdikter álemin zerttep, sırek kezdesetin túrlerdi qorǵaýmen aınalysady. Zertteý jumystary tek baq aýmaǵynda ǵana emes, eldiń barlyq óńirinde júrgiziledi.
"Biz zertteýde geoaqparattyq júıeler men drondardy qoldanamyz. Olar arqyly taý men shoqylardaǵy ósimdikterdiń jaı-kúıin baqylaımyz. Dron kómegimen ósimdikterdiń taralý aımaqtaryn túsirip, sırek kezdesetin túrler ósetin oryndarǵa GPS belgilerin ornatamyz. Osy derekterdiń negizinde erekshe qorǵaýdy qajet etetin aımaqtardy anyqtaımyz", – deıdi geobotanıka zerthanasynyń jetekshi ǵylymı qyzmetkeri Qapar Úsen.
Botanıkalyq baqta eriktiler qozǵalysy da qarqyndy damyp keledi. Ár senbi saıyn saǵat 10:00-de batys kireberiste jınalatyn "Jasyl reındjerler klýbyna" kez kelgen adam tegin qatysa alady.
"Biz eriktilermen tyǵyz jumys isteımiz. Kelýshilerge bıologtar men ekologtar dáris oqıdy, al eko-volonterler óz ıdeıalarymen bólisedi. Olar ósimdikterdi kútýge kómektesip, túrli jobalarǵa qatysady. Sonymen qatar bizdegi "Jasyl patrúl" toby baqtaǵy tártipti saqtaýǵa járdemdesedi", - deıdi marketıń jáne qoǵammen baılanys bóliminiń jetekshisi.
Bas botanıkalyq baqqa kelgen ár adam ǵylym men tabıǵatty qorǵaýǵa óz úlesin qosa alady. Sebebi bıletterden túsken barlyq qarajat ǵylymı zertteýler men tabıǵatty saqtaý jobalaryna jumsalady.